Vestager frá Danmörku vill verða forseti ESB-framkvæmdastjórnarinnar

 

Fulltrúi Dana í framkvæmdastjórn ESB, Margrethe Vestager, segist hafa hug á að verða forseti framkvæmdastjórnar ESB næstu fimm árin. Niðurstaða um hver skipar þetta forystusæti ESB eftir að Jean-Claude Juncker hverfur úr því að loknu kjörtímabili sínu ræðst eftir kosningarnar til ESB-þingsins 26.  maí.

Vestager tók af skarið um framboð sitt í svonefndu spitzenkandidatdebat (oddvitaviðræðum) í ESB-þinginu í Brussel fimmtudaginn 16. maí. Þar var hún þátttakandi fyrir Alde-þingflokkinn (frjálslynda), sjálf er hún þó ekki í framboði til ESB-þingsins. Í umræðunum átti hún í orðaskiptum við oddvita annarra ESB-þingflokka en þeir stefna einnig á forsetastólinn í framkvæmdastjórninni.

Margrethe Vestager er móðir þriggja dætra. Hún sat sem ráðherra í dönskum ríkisstjórnum og var formaður flokksins Radikale venstre.

Það eru ríkisoddvitar ESB-ríkjanna sem tilnefna forseta framkvæmdastjórnarinnar „með hliðsjón af kosningunum til ESB-þingsins“. Tilnefningaferlið hefst formlega að loknum kosningunum sunnudaginn 26. maí. Ákveðið er að leiðtogaráð ESB komi saman til aukafundar í Brussel þriðjudaginn 28. maí til fara yfir nöfnin. Um einum mánuði síðar hittist leiðtogaráðið að nýju og þar verður reynt að komast að samkomulagi um hvaða nafn skuli sent ESB-þinginu sem tekur endanlega ákvörðun.

Á dönsku vefsíðunni altinget.dk viðurkennir Margrethe Vestager að löng leið og ströng sé að forsetastólnum og líkur á að hún nái markmiði sínu séu litlar.

Margir eru um hituna.

Á leiðtogaráðsfundinum í júní ræðst ekki aðeins hverjir verða í framkvæmdastjórn ESB heldur einnig í forystusætum í leiðtogaráðinu, utanríkisþjónustu ESB og Seðlabanka evrunnar.

Fyrir utan Vestager vilja oddvitar EPP-þingflokksins (mið-hægri) Manfred Weber og þingflokks jafnaðarmanna, Frans Timmermans, verða forsetar framkvæmdastjórnarinnar.

Ekkert þeirra þriggja er öruggt um að koma yfirleitt til álita í leiðtogaráðinu. Á fundi sínum í febrúar ákvað leiðtogaráðið að ekki væri „nein sjálfvirkni“  milli oddvitaferlisins og valsins á næsta forseta framkvæmdastjórnarinnar.

Margerethe Vestager hefur áunnið sér virðingu langt út fyrir raðir ESB-landanna sem samkeppnisstjóri ESB. Hefur hún tekið stór heimsfyrirtæki föstum tökum og sektað um risafjárhæðir.