Tölvuárás gerð á vetrarólympíuleikanna

Sérfræðingar Suður-Kóreustjórnar vinna að því að upplýsa hvernig tölvuþrjótum tókst að trufla setningarathöfn vetrarólympíuleikanna í Pyeongchang föstudaginn 9. febrúar. Þráðlaust innra kerfi og netsamband var rofið. 

Mark Adams, talsmaður alþjóðaólympíunefndarinnar, sagði að allt benti til árásar á netkerfið en nú hefðu varnir þess verið auknar. Hann sagðist ekki ætla að lýsa atvikinu. Það yrði ekki gert á þessu stigi en nauðsynlegar ráðstafanir hefðu verið gerðar til að hindra frekari árásar. 

Sung Baik-you talsmaður s-kóresku skipulagsnefndarinnar sagði sunnudaginn 11. febrúar að öllu hefði verið kippt í lag. Vitað væri um undirrót vandans og vandræði sem þessi væru ekki óþekkt en í samráði við alþjóðaólympíunefndina yrði ekki greint frekar frá eðli þeirra. 

Í frétt DW segir að ýmis kerfi, þar á meðal internetið og sjónvarpsrásir, hefðu hrunið þegar setningarhátíðin var nýhafin eða klukkan 19.15 að staðartíma (11.15 ísl. tíma) föstudaginn 9. febrúar. Hafði ekki verið unnt að koma kerfunum í að fullu í rétt horf að morgni laugardags 10. febrúar.  

Vetrarleikarnir fara fram í aðeins 80 km fjarlægð frá Norður-Kóreu. Oft hafa Norður-Kóreumenn verið sakaðir um að beita sér fyrir tölvuárásum, má þar nefna WannaCry vírusinn sem fór um heim allan í fyrra. Norður-Kóreumenn segja allar ásakanir í sinn garð vegna árásarinnar nú fásinnu. Minnt er á að ekki hefur verið saminn friður milli Suður- og Norður-Kóreumanna síðan Kóreustríðið var háð 1950-53. Tæknilega séð ríkir því enn stríðsástand á Kóreuskaga. 

Rússar hafna einnig ásökunum um að þeir hafi gert tölvuárás á kerfi vetrarólympíuleikanna. Grunsemdir í garð Rússa má rekja til þess að þeim er bönnuð þátttaka í leikunum. Sannað er að þeir hafa skipulega misnotað lyf til að auka getu íþróttamanna sinna. 

Sérfræðingar benda á að leikarnir séu spennandi skotmark fyrir tölvuþrjóta sem vilja sanna hæfni sína og slá sér upp meðal jafningja með því að geta stært sig af því að brjótast gegnum tölvuvarnir þeirra.