Þýska stjórnin sendir Leopard 2 skriðdreka til Úkraínu

Olaf Scholz Þýskalandskanslari tilkynnti miðvikudaginn 25. janúar að stjórn sín mundi láta Úkraínumönnum í té Leopard 2 skriðdreka og samþykkja að ríkisstjórnir annarra landa gerðu slíkt sama.

Með tilkynningu sinni brást kanslarinn loks jákvætt við óskum stjórnvalda í Kyív um að fá öfluga skriðdreka til sóknar gegn rússneska innrásarhernum.

Þá höfðu pólsk stjórnvöld kynnt áform um að mynda samstöðu með öðrum ríkjum sem keypt hafa Leopard 2 skriðdreka til að knýja Þjóðverja til að samþykkja að þeir yrðu sendir til Úkraínu.

Þjóðverjar ætla að senda 14 Leonard 2 A6 skriðdreka úr vopnabúrum þýska hersins, Bundeswehr, til Úkraínu. Steffen Hebestreit, talsmaður þýsku stjórnarinnar, sagði: „Markmiðið er að mynda með hraði tvær skriðdrekasveitir með Leopard 2 fyrir Úkraínu.“

Þýskalandskanslari kynnti ríkisstjórn sinni ákvörðun sína að morgni miðvikudags 25. janúar. Innan stjórnarinnar höfðu samstarfsflokkar jafnaðarmannsins Scholz þrýst á hann að stíga þetta skref.

„Ákvörðunin er í samræmi við alkunnan vilja okkar til að styðja Úkraínu eins og við framast getum,“ sagði í yfirlýsingu Scholz. „Við stígum þetta skref í náinni samvinnu á alþjóðavettvangi.“

„Innan skamms“ verður hafist handa að þjálfa hermenn Úkraínu á skriðdrekunum í Þýskalandi sagði í yfirlýsingunni. Þar kom einnig fram að Þjóðverjar mundu leggja til skotfæri og varahluti með skriðdrekunum.