Home / Fréttir / Svíþjóð: Stuðningur við NATO eykst

Svíþjóð: Stuðningur við NATO eykst

Stuðningsmönnum NATO-aðildar fjölgar í Svíþjóð samkvæmt niðurstöðu könnunar sem birt var miðvikudaginn 20. apríl.

Demoskop gerði könnuna fyrir Aftonbladet og sýnir hún að 57% Svía styðja nú NATO-aðild, í mars voru þeir 51%. Nú eru 21% andvígir aðild en voru 24%, óákveðnum fækkar úr 25% í 22%.

Þegar niðurstaða mars-könnunarinnar var birt reyndist meirihluti Svía í fyrsta skipti í sögunni styðja aðild að NATO.

Svíar hafa ekki átt í hernaði við aðra í meira en 200 ár, það er á tíma Napóleons. Stefna þeirra í öryggismálum hefur til þessa verið reist á að „standa utan við hernaðarbandalög“.

Þáttaskil urðu í afstöðu Svía til öryggismála eftir innrás Rússa í Úkraínu 24. febrúar 2022.

Sænska ríkisstjórnin og jafnaðarmenn sem ráða henni endurmeta nú stefnu sína í öryggismálum og á matinu að ljúka fyrir lok maí 2022.

Könnun Demoskop var gerð 14. til 19. apríl. Þar kemur fram að meðal stuðningsmanna Jafnaðarmannaflokksins styðja mun fleiri NATO-aðild en eru andvígir henni.

 

Skoða einnig

Esbjerghöfn verði miðstöð NATO-herflutninga

  Danska ríkisstjórnin stefnir að því að höfnin í Esbjerg á Jótlandi gegni lykilhlutverki við …