Stoltenberg heimsækir Finna og Svía vegna NATO-aðildarinnar

Jens Stoltenberg, framkvæmdastjóri NATO, tók sunnudaginn 12. júní þátt í árlegum umræðufundi sem Sauli Niinistö Finnlandsforseti stjórnar, svonefndum Kultaranta-umræðunum, á sumarsetri sínu. Stoltenberg sagði að Finnland yrði aðili að NATO þrátt fyrir að Tyrkir gerðu athugasemdir vegna aðildarumsókna Finna og Svía.

Í aðdraganda þess að umsóknir Finna og Svía voru afhentar 18. maí var talið líklegt að þær yrðu endanlega samþykktar á ríkisoddvitafundi NATO í Madrid í lok þessa mánaðar. Stoltenberg sagði 12. júní að aldrei hefði verið litið á fundinn í Madrid sem loka-tímasetningu vegna umsóknanna.

Tyrknesk stjórnvöld saka Finna og Svía um að styðja kúrdíska uppreisnarmenn innan Tyrklands sem ógni öryggi Tyrkja og ríkis þeirra.

Stoltenberg sagði að á vegum NATO legðu menn hart að sér með Tyrkjum í leit að lausn.

„Við vinnum að þessu máli dag hvern í því skyni að finna lausn eins fljótt og kostur er,“ sagði framkvæmdastjórinn.

Hann lagði jafnframt áherslu á að Tyrkland, með land bæði að Sýrlandi og Írak, skipti miklu fyrir varnarbandalagið og gegndi lykilhlutverki í baráttunni gegn hryðjuverkum. Þar hefðu verið framin fleiri hryðjuverk en í nokkru öðru NATO-landi.

Stoltenberg áréttaði að dyr NATO væru áfram opnar og Tyrkir stæðu ekki í vegi fyrir aðild Finna að bandalaginu.

„Tyrkir leggjast ekki gegn aðild. Tyrkir vekja máls á áhyggjuefnum sínum svo að unnt sé að vinna áfram að aðildinni. Ég er viss um að Finnland verður aðildarríki NATO,“ sagði Stoltenberg.

Á blaðamannafundi með Stoltenberg sagði Sauli Niinistö forseti að Finnar færu ekki í NATO ef vandi Svía vegna ágreinings við Tyrki yrði til þess setja umsókn Svía í uppnám.

Stoltenberg í Svíþjóð

Eftir fundinn með Finnlandsforseta hélt Jens Stoltenberg til Svíþjóðar og mánudaginn 13. júní tók hann þátt í blaðamannafundi með Magdalenu Andersson forsætisráðherra í Harpsund, sveitasetri ráðherrans.

Á blaðamannafundinum kom fram að þau höfðu rætt NATO-aðildarumsókn Svía, athugasemdir Tyrkja og hótanir um að hindra framgang umsóknar Svía.

„Við tökum óróa Tyrkja af alvöru,“ sagði Stoltenberg.

„Ég þakka öflugan stuðning þinn við NATO-umsókn Svía,“ sagði Magdalena Andersson. Hún sagði Svía einnig taka afstöðu Tyrkja af alvöru og þeir legðu sig fram um að leysa úr ágreiningi við þá.