Home / Fréttir / Starfsmenn flóttahjálpar SÞ grunaðir um að vera í vitorði með Hamas

Starfsmenn flóttahjálpar SÞ grunaðir um að vera í vitorði með Hamas

Fjölmörg ríki, þeirra á meðal Ísland, hafa ákveðið að gera hlé á greiðslum til Flóttamannaaðstoðar Sameinuðu þjóðanna í Palestínu (The United Nations Relief and Works Agency for Palestine Refugees in the Near East) eftir að einhverjir úr starfsliði hennar sitja undir grun um að hafa átt aðild að árás að árás Hamas-hryðjuverkasamtakanna á Ísrael 7. október 2023.

Stofnunin hefur sagt upp samningum við starfsmennina og hafið rannsókn á málinu.

Íslensk stjórnvöld ætla að fresta greiðslum til flóttamannaaðstoðarinnar þar til rannsakað hefur verið til hlítar hvort starfsmenn hennar hafi átt þátt í hryðjuverkum Hamas í Ísrael 7. október.

Bjarni Benediktsson utanríkisráðherra sagði við fréttastofu ríkisútvarpsins síðdegis laugardaginn 27. janúar:

„Við tökum þetta mjög alvarlega og teljum algjört grundvallaratriði að málið verði rannsakað til hlítar. Við erum í samráði við önnur Norðurlönd um næstu skref, en frekari greiðslur verða frystar þar til að því samráði loknu.“

Bandaríkjamenn sem leggja mest fé af mörkum til UNRWA stöðvuðu greiðslur þangað föstudaginn 26. janúar þegar Ísraelar birtu gögn frá leyniþjónustu sinni sem sýndu að 12 starfsmenn UNRWA kynnu að hafa tekið þátt árásinni 7. október þegar Hamas-liðar gengu berskerksgang í suðurhluta Ísraels við Gaza og drápu að minnsta kosti 1.200 manns og tóku fleiri en 250 í gíslingu.

Israel Katz, utanríkisráðherra Ísraels, sagði laugardaginn 27. janúar að ríkisstjórn Ísraels mundi reyna að koma í veg fyrir að UNRWA héldi úti starfsemi á Gaza eftir að stríðinu lyki, „engin lausn“ fælist í UNRWA og stofnunin hefði starfað sem borgaralegur armur Hamas-hryðjuverkasamtakanna.

Hussein al-Sheikh, leiðtogi Frelsissamtaka Palestínu – Palestine Liberation Organization (PLO) – hvatti ríkisstjórnir til að endurskoða ákvarðanir sínar um að hætta stuðningi við UNRWA. Með ákvörðununum væri tekin mikil pólitísk og mannúðleg áhætta.

Um UNRWA

Lone Nørgaard, lektor, cand. mag og Torben Hansen sagnfræðingur birtu grein  á dönsku vefsíðunni altinget.dk 7. janúar 2018. Greinin birtist á íslensku síðar sama ár í tímaritinu Þjóðmálum.  Í greininni lýsa höfundarnir hlut Sameinuðu þjóðanna (SÞ) þegar litið er til palestínskra flóttamanna í kringum Ísrael.

Höfundarnir benda á að flóttamannavanda araba umhverfis Ísrael sé viðhaldið af SÞ-stofnuninni UNRWA – The United Nations Relief and Works Agency for Palestine Refugees in the Near East. Fáir viti um þessa stofnun þótt hún gegni lykilhlutverki í Palestínudeilunni. Það sé kannski ekki svo skrýtið því að einmitt UNRWA eigi mikið undir því að óreiðan haldist sem mest í Mið-Austurlöndum.

Í greininni segir:

„UNRWA var komið á fót árið 1949. Ætlunin var að stofnunin starfaði tímabundið í þágu arabískra flóttamanna. Hún starfar hins vegar enn þann dag í dag og í stað þess að vinna að því að arabísku flóttamennirnir settust að í öðrum Arabalöndum leggur UNRWA sig fram um að kynna þá sem píslarvotta í mjög sérstakri stöðu – og á þar oftast nána samleið með Arabalöndunum.

Palestínumenn hafa nefnilega fengið allt aðra réttarstöðu en allir aðrir hópar flóttamanna, þeim fjölgar þess vegna á sama tíma og fólki fækkar jafnt og þétt í öðrum hópum af eðlilegum aðstæðum og vegna aðlögunar.

Meðal flóttamannahópa eru Palestínumenn þeir einu sem hafa öðlast „right of return“ (endurkomurétt), að mati araba nær hann einnig til nátengdra og ekki aðeins flóttamannanna og sameiginlegra afkomenda þeirra. Það er alls ekki fyrir hendi neinn „right of return“ fyrir […] fyrir milljónir Hindúa sem urðu að flýja til Indlands þegar Pakistan kom til sögunnar árið 1947, hálfu ári áður en Ísraelsríki var stofnað.

Palestínumenn eru eini flóttamannahópurinn í veröldinni sem nýtur þeirrar viðurkenningar hjá fjölmiðlum og stjórnmálamönnum að hann hafi rétt til að snúa aftur til síns heima. […]

Hundruð þúsunda Palestínumanna og afkomendur þeirra njóta nú jórdansks ríkisborgararéttar en UNRWA lítur enn á þá sem flóttamenn. Börn, barnabörn, barnabarnabörn og barnabarnabarnabörn palestínskra flóttamanna í Líbanon geta ekki – jafnvel eftir tæplega 60 ára dvöl – fengið líbanskan ríkisborgararétt, þau mega ekki eiga eða eignast fasteign og þeim er bannað að starfa í vissum atvinnugreinum. Í öllum tilvikum er þarna brotið gegn sáttmálum sem gilda til dæmis í Danmörku.

Í staðinn fyrir að vinna að því að Palestínumenn falli inn í og lagi sig að nýjum gistilöndum sínum leggur UNRWA áherslu á að ýta undir reiði palestínsku flóttamannanna til að halda lífi í arfgengu hatri þeirra.“

Skoða einnig

Sænska þingið samþykkir tvíhliða samstarfssamning við Bandaríkin um varnarmál

Sænska þingið samþykkti tvíhliða samstarfssamning við Bandaríkin um varnarmál þriðjudaginn 18. júní. Víðtækur stuðningur var …