Spenna innan NATO vegna hernaðar Tyrkja gegn Kúrdum

Sókn tyrkneska hersins gegn hersveitum Kúrda í Afrin-héraði í norðurhluta Sýrlands skapar vanda innan NATO. Bandaríkjastjórn er hliðholl Kúrdum. Líkur eru á að spenna magnist milli aðildarríkja NATO vegna málsins. 

Rose Gottemoeller, vara-framkvæmdastjóri NATO, var í Ankara, höfuðborg Tyrklands, mánudaginn 22. janúar. Heimsókn hennar var ákveðin með löngum fyrirvara án tengsla við það sem nú er að gerast á vígvellinum í Afrin þar sem Kúrdar hafa búið um sig á afmörkuðu svæði. Athyglin sem heimsóknin vakti var meiri en ella hefði orðið vegna þess að verði átök milli herja Tyrkja og Bandaríkjanna verða þau á milli tveggja öflugustu herjanna innan NATO. 

Stjórnvöld í Ankara segja að þau vilji hreinsa svæðið næst landamærum sínum í Sýrlandi af öllum hermönnum Kúrda. Hersveitir þeirra hafi áratugum saman barist gegn tyrkneska hernum. Bandaríkjamenn líta hins vegar á Kúrda sem helstu bandamenn sína í baráttunni við hryðjuverkamenn í Sýrlandi. 

Gottemoeller ræddi við tyrkneska embættismenn sem fullvissuðu hana um að sóknin inn í Afrin-hérað yrði „stutt“. Í Brussel lögðum embættismenn NATO áherslu á að vara-framkvæmdastjórinn væri ekki í Ankara vegna vaxandi spennu milli Tyrkja og Bandaríkjamanna og henni væri ekki ætlað að sinna neinu sáttahlutverki vegna deilunnar.  

Meðal þess sem Gottemoeller gerði í Ankara var að leggja blómsveig við grafhýsi Mustafa Kemals Atatürks, stofnanda nútíma Tyrklands. 

Margir herfræðingar segja að átökin í Afrin séu alvarlegri en við blasi. Greinendur leynilegra upplýsinga segja að líta beri framgöngu Tyrkja í því ljósi að þeir hafi gengið til samstarfs við Rússa og Írani sem vilji setja skorður við bandarískum áhrifum í Sýrlandi. Bandaríkjamenn verði annað hvort að hörfa eða takast á við Tyrki. 

Heimild: DW