Spenna á landamærum Ítalíu og Frakklands – No Borders-menn hvetja til ofbeldis

Spenna ríkir í franska Miðjarðarhafsbænum Menton við landamæri Ítalíu vegna þess að föstudaginn 5. ágúst tókst um 200 farandmönnum að brjóta sér ólöglega leið þangað frá Ítalíu með aðstoð félaga í No Border-samtökunum. Ráðamenn í bænum krefjast þess að landamæravarsla verði stóraukin til að koma í veg fyrir að þetta endurtaki sig.

Af þeim 200 sem tókst að komast yfir landamærin í þessum átökum handtók franska lögreglan 152 strax sama kvöldið og sendi þá aftur til Ítalíu.

Aðkomumennirnir ólöglegu eru flestir frá Afríku, Súdanir eða Erítreumenn. Menton er í franska héraðinu Alpes-Maritimes sem nær meðal annars til Nice. Héraðsstjórnin segir að frá áramótum fram til 28. júlí 2016 hafi 14.000 ólöglegir aðkomumenn verið stöðvaðir í héraðinu, svipaður fjöldi og á sama tíma 2015. Um 90% þeirra voru sendir aftur til ítalíu.

Éric Ciotti, þingmaður lýðveldissinna (mið-hægrimanna) og forseti héraðsráðs Alpes-Maritimes, krefst þess að landamæravarsla gagnvart Ítalíu verði hert, hún sé ónóg nema um borð í járnbrautarlestum sem fara á milli landanna. Ciotti gagnrýnir Bernard Cazeneuve, innanríkisráðherra í stjórn sósíalista, fyrir að láta undan mótmælendum innan Frakklands. Hann segir eitt að ólöglegum aðkomumönnum fjölgi, hitt sé verra að aðgerðasinnar á borð við No Borders láti í vaxandi mæli að sér kveða. Það sé til skammar og leiði aðeins til ofbeldis. Yfirvöld líði þetta þótt neyðarástandi hafi verið lýst í landinu.

Ítalski bærinn Vintimille er næst frönsku landamærunum. Þar hafa farandmenn safnast saman í von um að komast ólöglega til Frakklands. Laugardaginn 6. ágúst fékk 53 ára gamall ítalskur lögreglumaður hjartaáfall og dó þegar kom til átaka í bænum við félaga í No Borders og aðra aðkomumenn. Spennan magnaðist svo hratt að Angelino Alfano, innanríkisráðherra Ítalíu, sagði sunnudaginn 7. ágúst: „Við viljum koma í veg fyrir að Vintimille breytist í nýja Calais.“

Þar vísaði ráðherrann til vandræðanna sem skapast hafa í franska bænum Calais við Ermarsund vegna þúsunda ólöglegra aðkomumanna sem þar hafa búið um sig í von um að komast þaðan ólöglega til Bretlands. Félagar í No Borders hafa staðið að mótmælum og óeirðum í Calais. Um þúsund farandmanna hafa nú búið um sig í Vintimille.

Samvinna er milli franskra og ítalskra stjórnvalda við landamæravörsluna. Þau hafa unnið að því að leysa upp smyglhringi sem starfa við landamærin og segir franska innanríkisráðuneytið að í ár hafi 221 hringur verið leystur upp á þessum slóðum miðað við 177 á sama tíma í fyrra. Bæjarstjórinn í Menton segir þessa tölu alls ekki segja alla söguna því að ólöglegum aðkomumönnum fjölgi dag hvern og þegar talað sé um smyglara sé aðeins átt við ósköp venjulega farandmenn.