Rússneska utanríkisráðuneytið ræðst á norsk stjórnvöld

Á norsku vefsíðunni Barents Observer birtist mánudaginn 23. nóvember frásögn eftir Atle Staalesen af vikulegum blaðamannafundi sem Maria Zakharova, upplýsingafulltrúi rússneska utanríkisráðuneytisins, efndi að þessu sinni til fimmtudaginn 19. nóvember.

Á fundinum réðst Maria Zakharova á norsk stjórnvöld og sagði þau fylgja and-rússneskri stefnu og öllum tilraunum stjórnvalda í Moskvu til að efna til friðsamlegra viðræðna hefði verið skipulega hafnað.

Tilefni þessara orða var spurning um viðveru bandarískra kafbáta í Norður-Noregi. Zakharova svaraði á þann veg að Noregur væri að verða „fótfesta NATO á norðurslóðum“ og þetta væri liður í hernaðarmannvirkjagerð NATO við landamæri Rússlands.

Upplýsingafulltrúinn lét þess hins vegar sérstaklega getið að norska þjóðin væri ekki and-rússnesk heldur ríkisstjórn hennar. Stundaðar væru blekkingar til að telja Norðmönnum trú um að líta bæri á Rússa sem óvini. Því væri skipulega haldið frá Norðmönnum sem Rússar hefðu að bjóða. Allt væri gert til að setja allt slíkt í rangt samhengi og beitt væri einkennilegum rökum um tilgang aðgerða Rússa til að gefa fólki ranga mynd af því sem fyrir þeim vekti. Það sem Norðmenn læsu í blöðum sínum væri fjarri því að vera satt.

Atle Staalesen segir að Maria Zakharova sé þekkt fyrir harkaleg ummæli um mikilvæg alþjóðamál og áður hafi hún ráðist á norsk stjórnvöld fyrir norðurslóðastefnu þeirra, þar á meðal varðandi Svalbarða.

Staalesen minnir á áralanga gagnrýni Rússa á NATO-aðild Norðmanna en rússnesk yfirvöld hafi jafnframt lagt áherslu á að góð tvíhliða samskipti væru á milli þjóðanna við norðurlandamæri þeirra og íbúar Norður-Noregs sýndu Rússum meiri „vinsemd“ en þeir sem búa sunnar í landinu.

Í lok frásagnar Barents Observer segir að það sé ótvíræður ógnartónn í yfirlýsingum rússneska utanríkisráðuneytisins. Maria Zakharova segi að Norðmenn geti ekki lengur fylgt „tveggja brauta stefnu“, annars vegar eiga samvinnu við Rússa á vissum sviðum en hins vegar beita „eyðileggjandi aðferðum“ til að halda Rússum í skefjum.

Upplýsingafulltrúi utanríkisráðuneytisins árétti að Rússar yrðu „að taka mið af aðgerðum Norðmanna þegar þeir leggi grunn að ráðstöfunum til að styrkja þjóðaröryggi sitt“.