Home / Fréttir / Rússar skila úkraínskum varðbátum – Frakklandsforseti fagnar

Rússar skila úkraínskum varðbátum – Frakklandsforseti fagnar

Úkraínsku bátarnir.
Úkraínsku bátarnir.

Frakkar fagna því sérstaklega að Rússar hafa skilað þremur varðbátum frá Úkraínu sem þeir hertóku í fyrra á Svartahafi. Telja Frakkar að með ákvörðun sinni auðveldi Rússar umræður á fundi í París í desember þar sem reynt verður að leysa úr deilum Rússa og Úkraínumanna.

Emmanuel Macron Frakklandsforseti sagði mánudaginn 18. nóvember að aðgerð Rússa stuðlaði að trausti í samtölum Rússa og Úkraínumanna. Áður hafði Macron rætt við Vladimir Pútin Rússlandsforseta í síma.

Rússar létu skipin af hendi snemma mánudaginn 16. nóvember.

Ætlunin er að 9. desember 2019 hittist Volodjimíjr Zelenskíj, forseti Úkraínu, og Vladimir Pútin í París ásamt Emmanuel Macron og Angelu Merkel Þýskalandskanslara. Þetta verður fyrsti fundur Pútins og Zelenskijs síðan sá síðarnefndi var kjörinn forseti Úkraínu í apríl 2019.

Alþjóðasakamáladómstóllinn komst að þeirri niðurstöðu í nóvember 2016 að stríðið í austurhluta Úkraínu væri „alþjóðleg vopnuð átök milli Úkraínu og Rússlands“. Aðskilnaðarsinnar eru hernaðarlega, stjórnmálalega og fjárhagslega studdir af stjórnvöldum í Moskvu sem vilja kljúfa Úkraínu. Þeir hafa háð stríð gegn stjórnvöldum í Kænugarði sem kostað hefur rúmlega 13.000 manns lífið síðan 2014.

Úkraínsku varðbátarnir þrír – tveir vopnaðir bátar og dráttarbátur – féllu í hendur Rússa 25. nóvember 2018 með hertöku við Kerch-sund undan Krímskaga sem Rússar innlimuðu ólöglega frá Úkraínu í mars 2014.

Rússar segja bátana hafa brotið gegn landhelgi sinni sem Úkraínumenn neita. Rússneska utanríkisráðuneytið sagði í yfirlýsingu 18. nóvember 2019 að bátunum hefði verið skilað eftir að „rannsakendur grandskoðuðu þá“ við að upplýsa „landhelgisbrot“ og ekki væri lengur þörf á að halda þeim í Rússlandi.

Úkraínumenn sögðu hertöku skipanna og handtöku 24 manna í áhöfnum þeirra brot á alþjóðlegum hafréttarlögum.

Hafréttardómstóll Sameinuðu þjóðanna sagði í dómi sínum 25. maí 2019 að Rússar ættu tafarlaust að sleppa áhöfnunum og bátunum þremur.

Sjómönnunum 24 var sleppt úr haldi 7. september 2019 í fangaskiptum milli Rússa og Úkraínumanna þar sem 35 manns frá hvoru landi komu við sögu.

Parísar-fundurinn 9. desember er haldinn innan ramma sem kenndur er við Normandí í Frakklandi og miðar að því að binda enda á átökin í Úkraínu. Hærra settir fulltrúar landanna fjögurra sem starfa innan þessa ramma hafa ekki hist síðan 2016.

Árið 2015 beittu Þjóðverjar og Frakkar sér fyrir Minsk-friðasamkomulaginu svonefnda sem aldrei hefur komið til framkvæmda en eftir símtal Macrons og Pútíns 18. nóvember 2019 sagði í tilkynningu frá Kreml að „hratt og til fulls“ yrði hægt að framkvæma Minsk-samkomulagið yrði vilji til þess staðfestur á Parísar-fundinum.

Zelenskíj hefur lagt sig fram um lausn deilunnar við Rússa eftir að hann var kjörinn forseti. Snemma í október 2019 náðu fulltrúar stjórnvalda í Kænugarði og Moskvu að minnka bilið sín á milli með því að samþykkja að draga herlið beggja aðila til baka frá tveimur átakapunktum í Luhansk-héraði og einum í Donetsk í því skyni að búa í haginn fyrir fjögurra ríkja viðræðurnar í París. Þetta hefur síðan verið gert stig af stigi.

 

 

Skoða einnig

NATO verður að móta norðurslóðastefnu til að svara umsvifum Rússa frá Kólaskaga

Liselotte Odgaard er Senior Fellow, Hudson Institute, Washington, D.C. Greinin sem hér er sagt frá …