Home / Fréttir / Pútin segist ætla að leggja alla Úkraínu undir sig

Pútin segist ætla að leggja alla Úkraínu undir sig

Vladimir Pútin Rússlandsforseti átti sjónvarpsfund með öryggisráði sínu fimmtudaginn 3. mars og sagði að bardaginn við „ný-nazista“ í Úkraínu gengi „samkvæmt áætlun“. Fréttaskýrendur telja að með orðum sínum vilji forsetinn slá á þá skoðun að andspyrna Úkraínumanna raski upphaflegri árásar-áætlun Rússa.

Á vígvellinum hefur rússneski herinn aukið sókn sína á hafnarborgina Mariupol við Azov-haf við suðurlandamæri Úkraínu og á Kharkiv, aðra stærstu borg Úkraínu. Rússar hafa borgina Kherson á valdi sínu.

Atburðir fimmtudaginn 3. mars:

  • Rússar og Úkraínumenn hittust í annað skipti til viðræðna í Hvíta-Rússlandi í því skyni að binda enda á stríðsátökin.
  • Eftir 90 mínútna símtal við Pútin telur Emmanuel Macron Frakklandsforseti að „ástandið versni enn“ þar sem Rússlandsforseti virðist staðráðinn í að leggja undir sig „allt“ landið að sögn aðstoðarmanns Macrons.
  • Volodymyr Zelenskíj Úkraínuforseti lofaði þjóð sinni að gert yrði við allt tjón af völdum rússneska hersins og Moskvustjórn mundi greiða kostnaðinn.
  • Sergeij Lavrov, utanríkisráðherra Rússa, sagði á fundi með erlendum blaðamönnum að hann teldi suma erlenda leiðtoga búa sig undir stríð við Rússa en Rússlandsstjórn mundi halda áfram hernaðaraðgerðum sínum í Úkraínu þar til „yfir lyki“.
  • Ein milljón manna hefur flúið Úkraínu á vikunni sem liðin er síðan Rússar hófu innrás sína. Af hálfu Sameinuðu þjóðanna er bent á að þetta sé mesti skyndiflótti fólks á þessari öld.
  • Alþjóðanefnd ólympíuleika fatlaðra tilkynnti að keppendur frá Rússlandi og Hvíta-Rússlandi fengju ekki að taka þátt í vetrarleikunum í Peking að þessu sinni. Miðvikudaginn 2. mars hafði nefndin heimilað liðum landanna þátttöku sem hlutlausum þar sem „íþróttamenn væru ekki árásaraðilinn“.
  • Rússneska varnarmálaráðuneytið sagði að 498 rússneskir hermenn hefðu fallið í stríðinu í Úkraínu og 1.597 særst. Fulltrúar hers Úkraínu segja að mannfall Rússa sé enn meira: 7.000 hafi fallið og mörg hundruð teknir til fanga.
  • Mannréttindaskrifstofa SÞ segir að 227 almennir borgarar hafi fallið og 525 særst á dögunum 24. febrúar til 1. mars. Þetta væru staðfestar tölur en rauntölurnar væru „töluvert hærri“.

Heimild: France 24

 

 

Skoða einnig

Gaslekinn liður í fjölþátta-stríði Rússa til að veikja stuðning Evrópu við Úkraínu

Með hraði er nú unnið að rannsókn á því hvort skemmdarverk séu að baki skyndilegum …