Home / Fréttir / Orbán segir dimm ský yfir Evrópu vegna innflytjenda

Orbán segir dimm ský yfir Evrópu vegna innflytjenda

Viktor Orbán
Viktor Orbán

Viktor Orbán, forsætisráðherra Ungverjalands, sér „dimm ský yfir Evrópu“. Þau megi rekja til straums innflytjenda og skeytingarleysis vestrænna stjórnmálamanna. Þetta kom fram í stefnuræðu sem hann flutti sunnudaginn 18. febrúar á fundi flokksmanna sinna í Búdapest.

Orbán er kunnur fyrir að kveða fast að orði í málflutningi sínum um innflytjendur. Hann segir að þeir hafi varpað dimmu skýi yfir Evrópu. „Þjóðir munu hverfa, Vesturlönd falla á sama tíma og Evrópumenn átta sig ekki einu sinni á  að trampað er á þeim.“

Forsætisráðherrann varaði einnig við að innan skamms tíma yrði meirihluti íbúa í evrópskum stórborgum múhameðstrúar. Hann sakaði andstæðinga sína um að skynja ekki „tímanna tákn“ og þeir hefðu skapað sér „vonlausa stöðu“ með því að leggjast gegn girðingu á landamærum Ungverjalands og láta hjá líða að styðja ríkisstjórnina í deilu hennar við ESB um mótttöku flóttamanna. „Ég skil ekki hvernig þessir menn geta óskað eftir að verða treyst,“ sagði Orbán og áheyrendur hans veifuðu ungverskum fánum. Á ræðustólnum stóð: Fyrir okkur, Ungverjaland fremst.

Orbán er þekktur fyrir harða afstöðu sína gegn innflytjendum. Þegar straumur flóttamanna var mestur lét hann reisa girðingu á landamærunum og stöðvaði þannig straum flóttamanna frá Balkanskaga. Innan ESB er meirihluti fyrir því að flóttamönnum verði skipt á milli aðildarríkjanna en Orbán er andvígur því.

Kosið verður til þings í Ungverjalandi í apríl og býr Orbán (54 ára) sig undir að halda embætti sínu þriðja kjörtímabilið í röð með stuðningi Fidesz-flokksins. Í könnunum mælist fylgi flokksins um 50% en helsti stjórnarandstöðuflokkurinn, Jobbik, sem skipar sér til hægri við Fidesz-flokkinn mælist með 20% fylgi. Fyrir fjórum árum hlaut Fidesz þrjá-fjórðu atkvæða í kosningum.

 

Heimild: FAZ

 

Skoða einnig

Rússar fá covid-bólusetningu í Serbíu

Krónuveirufaraldurinn herjar nú harkalega á Rússa og laugardaginn 16. október féllu í fyrsta sinn meira …