Home / Fréttir / Norska njósnastofnunin áréttar að langdræg rússnesk kjarnavopn skapi hættu í Norðurflotanum

Norska njósnastofnunin áréttar að langdræg rússnesk kjarnavopn skapi hættu í Norðurflotanum

Myndin er ekki ný en hún sýnir þegar Tsirkon skeyti er skotið i tilraunaskyni frá rússnesku freigátunni Admiral Gorshkov.

Hér var vitnað í norsku vefsíðuna Barents Observer sem eins og t.d. Newsweek  og Politico taldi í frétt um FOKUS 2023, ársskýrslu njósnastofnunar norska hersins, að þar væri gefið til kynna að kafbátar og herskip Norðurflota Rússa væru nú að nýju á hafi úti með skammdræg kjarnavopn um borð.

Væri þetta raunin markaði það gjörbreytingu á stefnu Rússa sem lýstu því opinberlega yfir 1991 að þeir hefðu fjarlægt skammdræg kjarnavopn af herskipum sínum og sett þau í vopnabúr á landi. Þetta væri gert með vísan til heiðursmannasamkomulags milli forsetanna Mikhaíls Gorbatsjovs og George Bush.

Á Barents Observer vefsíðunni fimmtudaginn 16. febrúar er vitnað í upplýsingafulltrúa njósnastofnunarinnar, Ann-Kristin Bjergene sem segir: „Textann mátti túlka á fleiri en einn veg.“

Stofnunin segir að í skýrslunni komi fram að mikilvægi langdrægra kjarnavopna í eigu Rússa væri að aukast.

Upphaflegri efnisgrein í skýrslunni hefur nú verið breytt og þar er nú áréttað að ekki hafi orðið nein breyting á vopnabúnaði herskipa, það er ofansjávarskipa.

Nú segir njósnastofnunin:

„Stríðið í Úkraínu hefur leitt til þess að hefðbundinn herafli Rússa hefur veikst. Af þessu leiðir að mikilvægi langdrægra rússneskra vopna hefur aukist. Í þessu samhengi gegna langdrægir kafbátar Norðurflotans lykilhlutverki vegna þess að þeir eru búnir kjarnavopnum. Við sjáum engar breytingar á vopnabúnaði rússneskra ofansjávar herskipa í Norðurflotanum.“

Ein setning snýr að skammdrægum kjarnavopnum í uppfærðu útgáfu skýrslunnar:

„Af skammdrægum kjarnavopnum stafar alvarlega hætta sé litið til ýmissa aðgerðasviðsmynda sem kunna að ná til NATO landa.“

Skoða einnig

Málstofan „Öryggi og varnir á norðurslóðum“ komin á Netið

Ánægjulegt að deila hér samantekt á nýlegu málþingi Varðbergs „Öryggi og varnir á norðurslóðum“ sem …