Moskva: Yfirbókavörður sakaður um ólögmæta dreifingu á efni frá Úkraínu

 

 

Natalia Sharina, yfirbókavörður Safns úkraínskra bókmennta í Moskvu, hefur verið ákærð fyrir að hvetja til óvildar í garð Rússa. Hún hefur setið í stofufangelsi í meira en eitt ár en mál hennar er nú komið fyrir dómstóla. Í ákærunni er Sharina sökuð um að hafa dreift bókmenntum sem skilgreindar eru sem öfgakenndar.

Hún hafnar þessum ásökunum og lögfræðingur hennar segir við BBC að undirrót ákærunnar sé pólitísk.

Í upphafi réttarhaldanna miðvikudaginn 2. nóvember kom til harðra orðaskipta milli bókavarðarins og saksóknarans.

Í upphafi máls síns vísaði saksóknarinn til langs lista sem hafði að geyma nöfn á útgáfuverkum frá Úkraínu sem væru annaðhvort bönnuð eða sérfræðingar teldu „niðurlægjandi“ fyrir Rússa. Það hefði verið saknæmt að afla þessa efnis og setja í bókasafnið.

Yfirbókavörðurinn svaraði: „Ég skil ekki hvað felst í ákærunni og finn því ekki til neinnar sektar. Saksóknarinn verður að skýra fyrir mér hvað ég hef í raun gert til að ýta undir óvild.“

Fyrir utan að vera sökuð um miðlun á efni frá Úkraíni er Sharina ákærð fyrir að hafa misfarið með fé.

Ivan Pavlov, lögfræðingur Sharinu segir að vitni hafi séð lögreglumenn lauma bönnuðum bókum inn í bókasafnið þegar þeir komu þar til húsleitar í október 2015. Hann sagði við BBC að málaferlin bæru vott um að stjórnvöld í Moskvu gerðu allt sem snerti Úkraínu tortryggilegt af pólitískum ástæðum.

Hann segir enga tilviljun að húsleit hafi verið gerð í bókasafni með efni frá Úkraínu en ekki frá Hvíta Rússlandi eða um kósakka.

Málið verður tekið fyrir að nýju eftir þrjár vikur. Natalia Sharina verður áfram í stofufangelsi eins og hún hefur verið í meira en eitt ár. Það var fyrst fyrir skömmu sem henni var leyft að fara í daglegar gönguferðir en henni er bannað að tala beint við fjölmiðlamenn.

Verði Natalia Sharina fundin sek kann meira en 10 ára fangelsisvist að bíða hennar.