Home / Fréttir / Julian Assange sviptur ríkisborgararétti í Ekvador

Julian Assange sviptur ríkisborgararétti í Ekvador

Julian Assange

Stjórnvöld í Ekvador hafa svipt Julian Assange, stofnanda WikiLeaks, ríkisborgararétti. Yfirvöldin segja marga ágalla hafa verið á umsókn hans þegar fyrri ríkisstjórn landsins samþykkti hana árið 2018. Assange var næstum sjö ár í sendiráði Ekvadors í London til að komast hjá framsali til Svíþjóðar árið 2012.

Dómsyfirvöld í Ekvador tilkynntu Assange formlega um sviptingu ríkisborgararéttarins. Hann situr nú í fangelsi í Bretlandi. Í tilkynningu yfirvalda Ekvador segir að ágallar hafi verið margir á umsókn Assange um ríkisborgararétt, þar megi nefna ósamræmi, ólíkar undirskriftir og ógreidd skráningargjöld.

Carlos Poveda, lögfræðingur Assange, sagði AP-fréttastofunni að ákvörðunin hefði verið tekin í Ekvador án þess að virða málsmeðferðarreglur og Assange hefði ekki fengið leyfi til að skýra mál sitt á vettvangi.

Fréttaskýrandi þýsku DW-fréttastofunnar segir að árum saman hafi örlög Assange virst ráðast af nýlegri vináttu hans við Ekvador. Vináttan hafi hins vegar dofnað jafnvel áður en fyrsti mið-hægri maðurinn í tæpa tvo áratugi var kjörinn forseti landsins í ár .

Lenin Moreno var forseti Ekvadors þegar Assange var veittur ríkisborgararéttur eftir áralanga vernd stjórnvalda landsins í sendiráðinu í London. Stjórn Morenos batt enda á dvölina í sendiráðinu árið 2019.

Í apríl sama ár handtók breska lögreglan Assange fyrir að hafa brotið ákvæði í sjö ára gömlu máli þar sem honum var sleppt gegn tryggingu. Hann hefur síðan verið lokaður inn í Belmarsh-öryggisfangelsinu í London.

Bandarískir saksóknarar hafa sakað Assange um 17 brot á njósnalögum og eitt tölvubrot sem tengist ólöglegri birtingu WikiLeaks á þúsundum skjala frá varnarmála- og utanríkisráðuneytunum. Verði Assange sakfelldur vegna þessara brota kann hann að verða dæmdur í allt að 175 ára fangelsisvist.

Í janúar 2021 ákvað breskur dómari í undirrétti að hafna kröfu um framsal Assange til Bandaríkjanna. Yfirréttur samþykkti nú í byrjun júlí að heimila bandarískum stjórnvöldum að áfrýja þessum úrskurði.

 

 

 

Skoða einnig

Sænska þingið samþykkir tvíhliða samstarfssamning við Bandaríkin um varnarmál

Sænska þingið samþykkti tvíhliða samstarfssamning við Bandaríkin um varnarmál þriðjudaginn 18. júní. Víðtækur stuðningur var …