Home / Fréttir / Fullkomnasti árásar-kafbátur Breta í heimahöfn

Fullkomnasti árásar-kafbátur Breta í heimahöfn

 

Artful á leið til sjávar.
Artful á leið til sjávar.

Artful, þriðji árásar-kafbáturinn af Astute-gerð í breska flotanum, hefur verið lagt við festar í heimahöfn sinni í Clyde-firði í Skotlandi. Þaðan verður hann sendur í reynslusiglingar áður en hann verður tekinn formlega í notkun síðar á þessu ári.

Um er að ræða hæstþróaða kafbát sem Bretar hafa nokkru sinni eignast en hann er 97 m langur og 7.400 lestir og var smíðaður í Barrow-in-Furness í Cumbria.

Heimahöfn bresku kafbátanna er vinnustaður 6.700 hermanna og borgaralegra starfsmanna og er ætlunin að stækka hann enn og starfsmenn þar verði 8.200 árið 2022. Er þetta stærsti einstaki vinnustaður í Skotlandi en skoskir þjóðernissinnar hafa horn í síðu hans og boða flutning breskra kjarnorkukafbáta frá Skotlandi fái landið sjálfstæði.

Breska stjórnin stefnir hins vegar að því að allir breskir kafbátar eigi heimahöfn í Clyde-firði, skammt fyrir utan Glasgow, frá og með árinu 2020.

Artful er knúinn kjarnorku og er unnt að sigla bátnum í kafi umhverfis jörðina. Súrefni fyrir áhöfnina er framleitt úr sjó á meðan báturinn er á ferð. Hið eina sem stytt getur úthald hans í kafi er skortur á vistum eða úthaldi áhafnarinnar.

Hér er um að ræða fyrsta kafbát Breta sem ekki er búinn sjónpípu. Þess í stað er notuð sérstök mynd-tækni. Myndir berast inn í stjórnstöð kafbátsins með ljósleiðurum. Hlustunarbúnaður um borð í kafbátnum er hinn fullkomnasti sem smíðaður hefur verið og jafngildir afl sónarsins vinnslugetu 2.000 fartölva.

Þótt kafbátar af Astute-gerð su 50% stærri en forverar þeirra af Trafalgar-gerð er mun verra að hafa upp á þeim neðansjávar en forverum þeirra vegna þess hve hljóðlátir þeir eru.

 

 

 

Skoða einnig

Norski varðskipaflotinn endurnýjaður

Skrokkurinn af KV Hopen, þriðja nýja ísstyrkta varðskipi Norðmanna, var dreginn til Vard Langsten skipasmíðastöðvarinnar …