Forseti Póllands vill NATO-her í Austur-Evrópu

Andrzej Duda, sem tók við embætti forseta Póllands hinn 6. ágúst 2015, sagði í Tallinn, höfuðborg Eistlands, sunnudaginn 23. ágúst að NATO ætti að halda úti fastaher í austurhluta Evrópu.

Hann sagði á fundi með blaðamönnum að NATO yrði að taka tillit til þess að varnarsvæði þess hefði breyst þegar ríki sem áður voru hluti Sovétríkjanna eða á áhrifasvæði þeirra hefðu öðlast sjálfstæði og gengið í bandalagið.

Forsetinn sagði að herir Bandaríkjanna og NATO-ríkjanna hefðu aðgang að virkum herstöðvum í austurhluta NATO. Hann hvatti til þess að þær yrðu notaðar.

„Við bjóðum herjum vina og bandamanna að koma og væntum þess að þeir þiggi boðið eða sendi vopn frá NATO-ríkjum svo að nota megi þau á svæðum sem nú mynda austurhluta bandalagsins,“ sagði forsetinn.

Duda skýrði tillögu sína um aukinn hernaðarviðbúnað NATO sem „algjörlega rökrétta og réttlætanlega, ekki aðeins í sögulegu ljósi heldur einnig með vísan til samtímaviðburða“. Hann sagði:

„Allir vita hvernig ástandið er. Tilburðir til yfirráða birtast að nýju og návist NATO-herafla er trygging fyrir þjóðir okkar.“

Hann vék að vaxandi yfirgangi Rússa í Austur-Evrópu og sagði ekki unnt að tryggja frið væru alþjóðalög brotin: „Við megum ekki láta viðgangast að alþjóðalög séu brotin, að landamæri séu rofin, að vegið sé að fullveldi og sjálfstæði ríkja. Því miður gerist þetta að nýju í Evrópu,“

Hann taldi að ekki ætti að láta við það eitt sitja að auka herafla NATO í Austur-Evrópu og beita Rússa viðskiptaþvingunum heldur ætti að knýja á um virðingu fyrir alþjóðalögum. Að ná því markmiði væri „gífurlegt verkefni“. Það þyrfti að koma á skynsamlegu diplómatísku sambandi í því skyni að ná samkomulagi um mikilvægustu málin.

Heimild: Baltic Times