Flóttamenn valda spennu milli stjórnvalda í Austurríki og Bæjaralandi

 

Spenna eykst milli Austurríkismanna og Þjóðverja vegna flóttamannastraumsins til Evrópu.  Meðal stuðningsmanna Angelu Merkel Þýskalandskanslara í flokki kristilegra demókrata (CDU) og í flokki kristilegra sósíalista (CSU) í Bæjaralandi vex óþolinmæði vegna afleiðinga þeirrar ákvörðunar kanslarans að bjóða aðkomufólki úr suðri til landsins. Í Bæjaralandi vilja ráðamenn að Merkel beiti kanslara Austurríkis hörku

Í byrjun vikunnar komu 8.000 manns á einum degi frá Austurríki til Bæjaralands. Engin viðvörun hafði verið gefin frá Vín um för fólksins til Bæjaralands. „Framkoma Austurríkismanna skapar vandræði milli granna. Svona getur maður ekki og á ekki að umgangast aðra,“ sagði Horst Seehofer, forsætisráðherra Bæjaralands og formaður CSU, mánudaginn 26. október. Áður hafði verið samið við stjórnvöld í Vín um að þau hleyptu 50 manns í senn yfir landamærin til Þýskalands.

Seehofer hefur verið mjög gagnrýninn á stefnu Merkel í málefnum flóttamanna. Í samtali við blaðið Passauer Neue Presse mánudaginn 26. október kynnti Seehofer úrslitakost gagnvart Merkel. Hún ætti tafarlaust að hringja í Werner Faymann, kanslara Austurríkis, og skipa honum að ná stjórn á framvindu mála gagnvart aðkomufólkinu. Merkel svaraði þriðjudaginn 27. október og hafnaði þessari kröfu, vinna yrði að málinu skref fyrir skref, ekki væri unnt að skrúfa á svipstundu fyrir strauminn. Hún væri auk þess í stöðugu sambandi við Austurríkismenn.

Merkel og Seehofer hittast laugardaginn 31. október og sunnudaginn 1. nóvember hitta þau Sigmar Gabriel, formann jafnaðarsmanna, samstarfsmanna Merkel í ríkisstjórninni.

Henning Otte, talsmaður þingflokks CDU í varnarmálum, hvetur til þess að þýski herinn verði virkjaður til landamæravörslu vegna komu fólks yfir landamærin gagnvart Austurríki og Tékklandi, Þýsk lög heimili að hernum sé beitt í þágu landamæravörslu sé álag um of á landamæralögregluna. Þannig sé málum háttað nú eins og á sínum tíma þegar hernum hafi verið falin verkefni við landamæravörslu vegna G8-leiðtogafundarins í Heiligendamm. Nú eigi að nýta ratsjár, þyrlur og dróna til að finna þá sem fara á ólögmætan hátt yfir landamærin.

Ríkisstjórn Austurríkis hefur ákveðið að reisa flóttamannagirðingu á landamærunum við Slóveníu. Ungverjar hafa nú þegar lokað landamærum sínum með slíkri girðingu, þess vegna streyma þeir um Króatíu, Slóveníu og Austurríki til Þýskalands. Johanna Mikl-Leitner, innanríkisráðherra Austurríkis, segir að girðingin eigi „ekki að vera þéttriðin“. Heldur eigi hún að auðvelda skipulegt eftirlit og skráningu.

Í Der Spiegel hefur birst frétt um að Seehofer íhugi að beina flóttamönnunum í gegnum Bæjaraland til annarra sambandslanda Þýskalands. Þá komi einnig til álita að smala flóttafólki í Bæjaralandi saman og senda til baka til Austurríkis í langferðabílum.

,Joachim Herrmann (CSU), innanríkisráðherra Bæjaralands, tók þriðjudaginn 27. október undir með Seehofer og sagðist aldrei hafa kynnst öðru til þessa en vinsamlegu samstarfi í lögreglumálum við Austurríkismenn, nú mætti hins vegar segja að austurrísk stjórnvöld sýndu „vísvitandi tillitsleysi“. Yrði ekki breyting hjá Austurríkismönnum neyddust Bæjarar til að grípa til sinna ráða.

Johanna Mikl-Leitner, innanríkisráðherra Austurríkis, sagði laugardaginn 24. október við Kronen Zeitung að Þjóðverjar tækju á móti alltof fáum hælisleitendum sem skapaði mikinn þrýsting á Austurríkismenn.