Evrópa: Þanþolið gagnvart aðkomufólki að bresta

Í Evrópu búa menn sig undir nýja bylgju af flóttamönnum eftir að það spyrst innan raða þeirra að nú sé auðveldara en áður að komast í gegnum Ungverjaland. Sunnudaginn 6. september komu hundruð flóttamanna í lestum frá Ungverjalandi til Westbanhof í Vínarborg. Þá höfðu ungverskir embættismenn heimilað þúsundum flóttamanna sem höfðu verið stöðvaðir í .Búdapest að halda áfram för sinni.

Þeir sem tóku á móti flóttamönnunum á brautarstöðinni í Vínarborg fögnuðu þeim með gleðihrópum. Í Ungverjalandi hafði verið beitt táragasi til að hrella flóttafólkið sem hafði búsið um sig við Keleti-brautarstöðina í Búdapest. Að morgni sunnudags voru flestir farnir leiðar sinnar með járnbrautarlestum.

Ýmsir ungverskir ráðamenn hafa lýst áhyggjum yfir að fréttir af mildari viðbrögðum í Ungverjalandi muni kalla á nýja flóttamannabylgju. Vilja þeir að varðstaða við girðinguna sem reist hefur verið á landamærum Serbíu verði aukin.

Flóttamennirnir vilja flestir komast til Þýskalands. Mánudaginn 7. september töldu yfirvöld í Bæjaralandi, þýska sambandslandinu næst Austurríki, að þau mundu þann daga taka á móti 10.000 flótta- og farandfólki en um helgina komu þangan 20.000.

Frá München, höfuðborg Bæjaralands, er aðkomufólkið flutt með lestum eða langferðabílum til annarra borga í Þýskalandi þar sem því er komið fyrir í sérstökum búðum á meðan umsóknir um hælisvist eru skoðaðar.

Í München hefur almenningur tekið á móti fólkinu á brautastöð borgarinnar, fært því mat og drykk og börnunum leikföng. Yfirvöldin segja hins vegar að nú sé brátt komið að mörkum þess fjölda sem unnt sé að sinna.