Erdogan hótar ESB að opna landamærahliðin

Recep Tayyip Erdogan, forseti Tyrklands, sagði föstudaginn 25. nóvember að Tyrkir mundu ekki áfram stöðva för farand- og flóttafólks til Evrópu ef ESB héldi áfram að beita þá þrýstingi.

Daginn áður hafði ESB-þingið samþykkt að setja skyldi aðildarviðræður ESB og Tyrkja á ís. Erdogan sagði í Istanbúl og beindi orðum sínum að ESB:

„Ef þið stigið lengra en þetta verða landamærahliðin opnuð. Þessar hótanir hafa hvorki áhrif á mig né þjóð mína. Það skipti engu máli þótt þið féllust allir að niðurstöðu [ESB-þingsins].“

Stjórn Tyrklands og ESB sömdu um lokun landamæra Tyrklands í mars 2016. ESB lofaði að leggja fram milljarða evra í stuðning við Tyrki og að afnema vegabréfsáritunarskyldu fyrir Tyrki.

„Það kemur í okkar hlut að fæða 3-3,5 milljónir flóttamanna í landi okkar,“ sagði Erdogan í ræðu sinni 25. nóvember. „Þið svikuð loforð ykkar.“

Frá því að tilraun var gerð til valdaráns í Tyrklandi um miðjan júlí 2016 hafa meira en 125.000 manns – þ. á m. hermenn, háskólamenn, dómarar, blaðamenn og forystumenn hlynntir Kúrdum – verið handteknir eða reknir frá störfum.

ESB-þingið samþykkti ályktun fimmtudaginn 24. nóvember með 479 atkvæðum gegn 37 þar sem framkvæmdastjórn ESB og ríkisstjórnir ESB-landa eru hvattar til frysta aðildarviðræður ESB og Tyrklands. Þær hafa staðið í 11 ár án markverðs árangurs.

Federica Mogherini, utanríkismálastjóri ESB, sagði að yrði farið að tillögu ESB-þingsins yrði enginn bættari. Best væri að stuðla að auknu lýðræði í Tyrklandi með því að halda öllum boðleiðum opnum.