Varðberg, samtök um vestræna samvinnu og alþjóðamál Varðberg, samtök um vestræna samvinnu og alþjóðamál
Bandaríski flugherinn hefur skýrt frá því að tveimur B-52 vélum hafi verið flogið án millilendingar fram og til baka til Ástralíu til æfinga þar.
Sprengjuvélarnar tóku á loft frá Barksdale Air Force Base í Louisiana-ríki, flugu til Ástralíu, féllu inn í æfingu ástralska hersins, slepptu venjulegum sprengjum og sneru síðan aftur til Bandaríkjanna.
Vélunum var flogið alls samfellt í 44 tíma.
„Með þessu flugi vildu Bandaríkjamenn sýna eina af mörgum aðferðum sem þeir geta beitt í þágu stöðugleika og friðar á Indlands-, Asíu- og Kyrrahafssvæðinu,“ sagði Cecil D. Haney, flotaforingi og yfirmaður U.S. Strategic Command, langdræga bandaríska heraflans, við UPI-fréttastofuna.
Sprengjuvélar U.S. Strategic Command efna reglulega til slíkra æfinga um heim allan. Í júní voru þrjár B 52 vélar í flugstöð breska flughersins í Fairford á Bretlandi. Þær tóku meðal annars þátt í fjölþjóðlegri flotaæfingu undan strönd Svíþjóðar á Eystrasalti.
