Home / Fréttir / Víðtæk tölvuárás í Úkraínu, Rússlandi og annars staðar í Evrópu

Víðtæk tölvuárás í Úkraínu, Rússlandi og annars staðar í Evrópu

ok-hacking

Með víðtækri árás síðdegis þriðjudaginn 27. júní tókst tölvuþrjótum að lama fyrirtæki, flugvelli, banka og stjórnarskrifstofur í Úkraínu. Tölvuþrjótarnir réðust síðan á kerfi annars staðar í Evrópu meðal annars Rosneft-olíufélagið í Rússlandi og Maersk-skipafélagið í Kaupmannahöfn.

Talið er að 80 fyrirtæki í Rússlandi og Úkraínu hafi orðið fyrir barðinu á vírusnum Petja, gíslatökuforriti sem lokar tölvukerfum og hafnar óskum að þau séu opnuð að nýju nema greitt sé „lausnarfé“, oft himinhátt.

Stjórnarskrifstofur Úkraínu gátu ekki varist tölvuárásinni sem einnig var gerð á seðlabanka landsins, ríkisrekna flugvélasmiðju, flugvöllinn í Kænugarði og jarðlestakerfi borgarinnar sem lamaðist.

Þjóðaröryggisráð Úkraínu telur að sjá megi merki um aðild Rússa að árásinni.

Auglýsingafyrirtækið WPP í Bretlandi sagðist einnig hafa orðið fyrir tölvuárás og í Hollandi tilkynnti stórt skipafélag að tölvukerfi þess væri í lamasessi.

Árásin er gerð fáeinum vikum eftir að WannyCry forrit var notað til árása í meira en 150 löndum og lamaði hluta af breska heilbrigðiskerfinu.

Bandarískir og breskir sérfræðingar telja að árásina sem gerð var í maí megi rekja til Norður-Kóreu. Enn er óljóst hver stóð að baki árásinni 27. júní.

Danska skipafélagið Maersk sem hefur starfstöðvar um heim allan sagði að mörgum þeirra hefði verið lokað eftir tölvuárásina.

 

Skoða einnig

Norska strandgæslan tók þessa mynd af rússneska Typhoon-kafbátnum undan strönd Noregs.

Rússneskur risakafbátur ofansjávar við strönd Noregs – í fyrsta sinn á Eystrasalti

  Hvers vegna siglir Dmitríj Donskojs – stærsti kjarnorkuknúni kabátur heims – ofansjávar suður með …