fbpx
Home / Fréttir / Úkraínuforseti segir Rússa sækja með her að landi sínu

Úkraínuforseti segir Rússa sækja með her að landi sínu

Petro Porosjeno Úkraínuforseti flytur þjóðhátíðarræðu.
Petro Porosjeno Úkraínuforseti flytur þjóðhátíðarræðu.

Petro Porosjenko, forseti Úkraínu, varaði í þjóðhátíðarræðu sunnudaginn 23. ágúst við hættu á innrás Rússa. Hann sagði að óvinurinn fylgdi fram hugmyndinni um beina árás á Úkraínu í ræðu sem hann flutti á Maidan, Sjálfstæðistorginu í hjarta Kænugarðs. Taldi forsetinn að meira en 50.000 hermenn væru í Rússlandi, við landamæri Úkraínu, og á átakasvæðinu í Donbass, innan landamæra Úkraínu, væru 40.000 manns undir vopnum, þar af 9.000 virkir rússneskir hermenn. Ráðamenn Rússlands hafna öllum ásökunum í þessa veru.

„Rússneska stjórnin hefur lagt stríðsmönnunum til 500 skriðdreka, 400 stórskotaliðsvopn og 950 brynvarðar bifreiðar. Í þessari viku einni hafa þrjár stórar fylkingar hermanna farið yfir landamæri okkar í áttina að Luhansk, Donezk og Debalweze,“ sagði forsetinn.

Hann boðaði að her Úkraínu yrði enn efldur. Rúmlega 2.000 hermenn frá austurvígstöðvunum gengu án hergagna um Sjálfstæðistorgið á þjóðhátíðinni. Þá sagði Porosjenko: „Á 25. afmælisári sjálfstæðis lands okkar göngum við á þunnum ís. Við verðum að átta okkur á því að minnsta feilspor gæti verið banvænt.“

Skoða einnig

Afstaðan til Kínverja hitamál á toppfundi NATO

Ríkisoddvitafundur NATO verður í Brussel mánudaginn 14. júní. Þess er vænst að á fundinum staðfesti …