Home / Fréttir / Þjóðverjar skilgreina hvaða vinstrimennska er refsiverð vegna G20-mótmælanna

Þjóðverjar skilgreina hvaða vinstrimennska er refsiverð vegna G20-mótmælanna

Rote Flora leikhúsið í Hamborg - griðastaður vinstrisinna.
Rote Flora leikhúsið í Hamborg – griðastaður vinstrisinna.

Í Þýskalandi er rætt um hvar eigi að draga mörkin milli þess sem er refsivert við mótmælaaðgerðirnar í Hamborg vegna G20-fundarins þar 6. og 7. júlí. Í blaðinu Frankfurter Allgemeine Zeitung birtist fimmtudaginn 13. júlí viðtal við Thomas Noetzel prófessor í stjórnmálakenningum og hugmyndasögu síðan árið 2002 við Philipps-Universität Marburg í Þýskalandi. Það fer hér í lauslegri þýðingu:

Herra Noetzel frá því að G20-leiðtogafundinum lauk er að nýju talað meira en áður um stöðuna á vinstrivængnum í Þýskalandi. Er í raun munur á vinstri-róttæklingum og vinstri-öfgamönnum?

Já, auðvitað. Róttæklingar vilja komast að rótum vandans og fallast því ekki á neina málamiðlun. Öfgamenn ganga einu skrefi lengra. Maður verður öfgamaður með því að fara með skoðanir sínar út á götur og torg. Öfgamaðurinn tekur róttæklinginn mjög alvarlega – hann hrindir hugmyndum hans í framkvæmd. Mér finnst annars miklu erfiðara að finna sniðmengi vinstri-róttæklinga og vinstri-öfgamanna.

Hvað felst í því?

Báðum hópum er sameiginlegt að þeir vilja kasta ríkjandi kerfi að fullu fyrir róða. Í því felst mikil hætta að mínu mati þar sem samúð með þessum hugmyndum hefur náð að dreifa sér víða um samfélagið. Þetta kom í ljós í G20-mótmælunum. Það má til dæmis nefna að vinstrisinnaði stjórnmálamaðurinn Jan van Aken [þýð: þýskur aðgerðasinni fyrir Greenpeace og sambandsþingmaður fyrir Die Linke, lengst til vinstri. Hann situr í utanríkismálanefnd sambandsþingsins og undirnefnd um afvopnunarmál] sýnir samúð með Rote Flora [þýð: hér er hópur vinstrisinna kenndur við gamalt leikhús í Hamborg sem er aðsetur hústökumanna og hefur áunnið sér orð um alla Evrópu sem samastaður vinstri-róttæklinga] þótt hann sé hvorki vinstri-róttæklingur né vinstri-öfgamaður.

Rote Flora segist vera vinstri-fullvalda. Hver er munurinn á vinstri-fullvalda og vinstri-rótæklingum og vinstri-öfgamönnum?

Vinstri-fullvalda leggja þunga áherslu á að þeir standi utan fylkinga. Þeir telja sig vera handan klassísks ágreinings vegna kapítalismans. Hjá þeim snýst málið ekki lengur um verkalýðsstéttina eða stéttabaráttuna. Hjá þeim fullvalda beinist athyglin á menningarlegum þáttum.

Hvað felst nákvæmlega í því?

Lítið á Rote Flora í Hamburg. Þar er stofnað til vinnustofa og fjöldamálsverða [frá ritstjórn: til slíkra málsverða er efnt reglulega og er málsverðurinn fáanlegur á innkaupsverði eða jafnvel niðurgreiddur]. Með þessu er verið að stjórnmálavæða hversdagslífið eða stunda „fyrstu-persónu pólitík“. Hér er horft til þess sem snertir þann sem á í hlut þótt stjórnmál séu í raun samfélagsmál. Lýsa mætti því sem gerðist í Hamborg sem útrás vinstri-öfga sjáflsdýrkunar.

Hvernig er unnt að tengja það samtökunum sem kalla sig Velkomin til vítis?

Í mínum huga er það hrein og klár öfgahyggja. Bara að vísa til vítis er með ólíkindum. Samtökin eru í grunnin róttæk. Þau breytast hins vegar í öfgasamtök um leið og þau fara með hugmyndir sínar út á götur og torg. Ég ítreka: Vinstri-öfgahyggja er vinstri-róttækni sem hrundið hefur verið í framkvæmd. Mótmælendunum var kappsmál að stigmagna átökin.

Öryggislögreglan talar aðeins um vinstri-öfgamenn en ekki vinstri-róttæklinga. Hvers vegna?

Ekki er enn unnt að sakfella menn einungis vegna skoðana sinna.

 

Skoða einnig

Børge Brende, utanríkisráðherra Noregs, og Erna Solberg forsætisráðherra.

Fráfarandi utanríkisráðherra Noregs verður forseti WEF

Børge Brende, utanríkisráðherra Noregs, tilkynnti föstudaginn 15. september að hann hefði verið skipaður forseti World …