Home / Fréttir / Svíar öruggari innan NATO – segir í nýrri skýrslu

Svíar öruggari innan NATO – segir í nýrri skýrslu

 

Þýakur hermaður á heræfingu í Litháen.
Þýakur hermaður á heræfingu í Litháen.

Verði stríð á Eystrasalti kunna Rússar að ráðast fyrst á Svíþjóð. Svíar geta þó ekki varist án aðstoðar annarra. Þetta kemur fram í skýrslu sem afhent verður sænsku ríkisstjórninni í föstudaginn 9. september og sýnir að það hefur fleiri kosti fyrir Svía að ganga í NATO segir í grein eftir Mikael Holmström í sænska blaðinu Dagens Nyheter (DN) sem birtist á vefsíðu blaðsins fimmtudaginn 8. september eftir að blaðamaðurinn hafði lesið skýrsluna.

Skýrsluna sem Margot Wallström, utanríkisráðherra Svía, fær afhenta 9. september samdi Krister Bringéus sendiherra og ber hún heitið Säkerhet i ny tid – Öryggi á nýjum tímum. Niðurstaðan er að betra sé fyrir Svía að vera innan NATO en utan þótt ekki sé lögð fram nein tillaga um það. Í DN segir að lykilsetningin í skýrslunni sé þessi:

„Greinilegustu áhrif aðildar að NATO yrðu eftir öllu að dæma að öryggisleysið sem ríkir nú um hvernig sameiginlegt átak yrði framkvæmt í krísu á Eystrasalti hverfur og sameiginlegur vilji Vesturlanda til að bregðast við átökum mundi þar með aukast.“

Skýrslan er samin á grundvelli samkomulags fimm sænskra stjórnmálaflokka árið 2015. Borgaraflokkarnir þrír kröfðust þess að skýrsla yrði gerð um aðild að NATO en vinstri flokkarnir tveir, sem nú sitja í stjórn, vildu ekki hverfa frá stefnunni um að standa utan hernaðarbandalaga. Niðurstaðan var málamiðlun um að fenginn yrði „frístandandi“ skýrsluhöfundur.

Í skýrslunni er lýst dökkri mynd af nágrenni Svíþjóðar á tímum þegar Rússar sýna Vesturlöndum æ meiri óvild. Nú sé „nýtt normalástand í öryggismálum í Evrópu“ þar sem átakalínan milli Rússlands og Vesturlanda hefur flust frá Mið-Evópu til Eystrasaltssvæðisins.

Rætt er um Rússland sem „eina ríkið í nágrenni Svíþjóðar sem hugsanlega kunni að beita herafla gagnvart nágrönnum sínum“.

Útilokað er að aðeins verði ráðist á Svíþjóð. Hins vegar verði að líta á Eystrasaltið sem strategíska heild, það er sem átakasvæði fyrir Rússland og NATO. Þess vegna verði Svíar að búa sig undir að dragast á fyrstu stigum inn í hernaðarátök milli Rússa og Eistlendinga, Letta og Litháa.

Skýrsluhöfundur segir að ólíklegt sé að til hernaðarátaka komi en verði þau engu að síður yrðu afleiðingarnar hörmulegar. Hættan á stríði sé mest vegna þess hve mikil óvissa ríki um stefnu og áform Rússa.

Skoða einnig

Børge Brende, utanríkisráðherra Noregs, og Erna Solberg forsætisráðherra.

Fráfarandi utanríkisráðherra Noregs verður forseti WEF

Børge Brende, utanríkisráðherra Noregs, tilkynnti föstudaginn 15. september að hann hefði verið skipaður forseti World …