Home / Fréttir / Söguleg konungsheimsókn frá Sádi Arabíu til Rússlands

Söguleg konungsheimsókn frá Sádi Arabíu til Rússlands

Salman bin Abdulaziz al Saud, konungur Sádi-Arabíu, og Vladimír Pútín í Moskvu.
Salman bin Abdulaziz al Saud, konungur Sádi-Arabíu, og Vladimír Pútín í Moskvu.

Salman bin Abdulaziz al Saud, konungur Sádi-Arabíu, heimsótti Rússland miðvikudaginn 4. október. Urðu þá tímamót í samskiptum landanna tveggja, mestu olíuútflutningsríkja heims. Konungur Sáda hefur aldrei fyrr hitt forseta Rússlands í Moskvu.

Í tengslum við heimsókn konungsins var ritað undir bráðabirgðasamkomulag um að Sádar kaupi S-400 loftvarnakerfi af Rússum. Þá hafa Sádar einnig áform um að kaupa Kornet-flaugar gegn skriðdrekum og skotpalla fyrir flugskeyti.

„Þetta er í fyrsta sinn sem konungur Sádi-Arabíu heimsækir Rússland í sögu samskipta okkar sem er í sjálfu sér mjög merkilegur atburður. Við höfum átt samskipti í töluvert langan tíma,“ sagði Pútín á fundi með konungnum og lýsti von um að tvíhliða samskipti landanna mundu aukast.

Konungurinn sagði hins vegar að stjórnvöld í Riyadh, höfuðborg Sádi-Arabíu, vildu efla samskipti sín við ráðamenn í Moskvu í þágu friðar og öryggis auk þess að styrkja þróun alþjóðaefnahagsmála.

Utanríkisráðherra Sádi-Arabíu sagði að ritað yrði undir nokkur „mikilvæg skjöl“. Rússneska iðnaðar- og viðskiptaráðuneytið sagði að Sádar ætluðu að festa fé  í meira en 25 landbúnaðar-, olíu- og gasverkefnum. Þá sé ætlunin að koma á fót sameiginlegu fjárfestingafyrirtæki í orkumálum.

Salman bin Abdulaziz Al Saud bauð Vladimír Pútín í heimsókn til Sádi-Arabíu sem Rússlandsforseti þáði. Hann sagðist minnast fyrri heimsókna sinna til Riyadh með ánægju.

Konungurinn sagði að þeir ætluðu að halda áfram jákvæðri samvinnu sinni til að skapa jafnvægi á alþjóðlegum olíumörkuðu.

 

Skoða einnig

Jafnaðarmaðurinn (SPÖ) Christian Kern, kanslari Austurríkis, á kosningafundi.

Austurríki: Jafnaðarmenn óttast að tapa fylgi og völdum

Jafnaðarmaðurinn (SPÖ) Christian Kern, kanslari Austurríkis, flutti hörð varnaðarorð gegn hægri bylgjunni meðal kjósenda í …