Home / Fréttir / Rússar ókyrrast vegna Bandaríkjamanna á Jan Mayen

Rússar ókyrrast vegna Bandaríkjamanna á Jan Mayen

Bandaríkjamenn við athuganir á Jan Mayen.
Bandaríkjamenn við athuganir á Jan Mayen.

Rússar sögðu fimmtudaginn 13. febrúar að þeim stæði alls ekki á sama um að fulltrúar bandaríska flughersins hefðu fyrir nokkru farið til Jan Mayen. Hvöttu þeir norsk stjórnvöld til að stuðla ekki að neinu sem græfi undan stöðugleika á þessu strategíska svæði.

Hópur manna frá bandaríska flughernum heimsótti Norðmenn sem dveljast á Jan Mayen í nóvember 2019 til að kanna hvort bandarísk C-1301 Super Hercules herflutningavél gæti lent á flugbraut eyjunnar.

Þegar fulltrúi rússneska utanríkisráðuneytisins ræddi heimsókn Bandaríkjamannanna við blaðamann Reuters-fréttastofunnar sagði hann að nýlegar aðgerðir á vegum norska hersins beindust að lokum gegn Rússum og þær minnkuðu stöðugleika á svæðinu.

„Við vonum að stjórnvöld í Osló sýni ábyrgð og framsýni við mótun stefnu sinnar í norðri og haldi sig frá öllu sem veikir svæðisbundinn stöðugleika og skaðar tvíhliða samskipti,“ sagði fulltrúi utanríkisráðuneytisins.

Fyrr í þessum mánuði sökuðu rússnesk yfirvöld norsk stjórnvöld um að takmarka svigrúm sitt á Svalbarða. Óskuðu Rússar eftir viðræðum við Norðmenn til að leysa málið.

Frank Bakke-Jensen, varnarmálaráðherra Noregs, hefur gert lítið úr áhrifum ferðar Bandaríkjamannanna til Jan Mayen á stöðu öryggismála á norðurslóðum og samskipti Norðmanna við Rússa.

„Flugferðir einstakra flutningavéla til Jan Mayen á vegum bandalagsþjóða hefur ekki áhrif á stöðu eða stefnu öryggismála á norðurslóðum,“ sagði varnarmálaráðherrann við Stórþingið.

Hann sagði að vegna álags á norska flugherinn hefði bandamönnum Norðmanna verið send beiðni á árinu 2019 um aðstoð með flutningavélum. Flugvélar frá Austurríki, Svíþjóð, Danmörku og Frakklandi hefðu flogið til Jan Mayen á árunum 2017 til 2019.

„Jan Mayen verður ekki notuð í þágu hernaðaraðgerða,“ sagði norski varnarmálaráðherrann.

 

Heimild: Reuters, Maria Kiselyova Moskvu og Gwladys Fouche Osló.

Skoða einnig

Lars Findsen, forstjóri njósnastofnunar danska hersins.

Yfirnjósnari Dana varar við kínverskum hátæknifyrirtækjum

Lars Findsen, yfirmaður njósnadeildar danska hersins, Forsvarets Efterretningstjeneste (FE), segir í forsíðuviðtali við Jyllands-Posten mánudaginn …