Home / Fréttir / Rússar auka þrýsting á Úkraínustjórn með aðskilnaðarsinnum

Rússar auka þrýsting á Úkraínustjórn með aðskilnaðarsinnum

Hermaður aðskilnaðarsinna óvirðir fána Úkraínu.
Hermaður aðskilnaðarsinna óvirðir fána Úkraínu.

Alexander Zakharsjenkó, leiðtogi aðskilnaðarsinna í austurhluta Rússlands, tilkynnti þriðjudaginn 18. júlí að hann ætlaði að beita sér fyrir að koma á fót Malorossija (Litla Rússlandi) með Donetsk sem höfuðborg.

Á tímum Rússakeisara var þetta orð notað um hluta þess lands sem nú er Úkraína og vekur það vondar minningar í huga margra Úkraínumanna.

Zakharsjenkó er hollur Rússum og segir að hann geri þessa tillögu til að stuðla að friðsamlegri lausn á erfiðri deilu án þess að stofna til styrjaldar. Þetta sé lokatillaga sín. Í henni felst að Úkraína verði sambandsríki og njóti einstök fylki innan þess verulegrar sjálfstjórnar.

Petro Porosjenkó, forseti Úkraínu, segir að Zakharsjenkó sé ekki annað en strengjabrúða Rússa. Talið er að Moskvumenn vilji nú setja eitthvað á svið til að ögra öðrum, einkum Bandaríkjamönnum.

Svonefnd alþýðulýðveldi Donzek og Luhansk eru að sögn Alexanders Zakharsjenkós,  einu hlutar landsins undir lögmæltri ríkisstjórn.

Frankfurter Allgemeine Zeitung segir þessa atburði ekki koma þýsku ríkisstjórninni á óvart. Vladimir Pútín Rússlandsforseti hafi gefið til kynna í viðræðum í tengslum við G20-leiðtogafundinn í Hamborg að hann mundi viðurkenna sjálfstæði landsvæðanna.

Undanfarna mánuði hafa ráðamenn í Moskvu stigið mörg skref í átt að raunverulegri innlimun landshlutanna. Þeir undirbúa að rúblan verði gerð að lögeyri svæðanna og þau viðurkennd sem alþýðulýðveldi.

Frankfurter Allgemeine Zeitung segist hafa heimildir fyrir því að Bandaríkjastjórn ætli að auka vopnasölu til Úkarínustjórnar, þar á meðal varnareldflaugar gegn skriðdrekum.

Þá segir þýska blaðið að af hálfu G7-ríkjanna sé unnið að áætlun um endurbætur á stjórnarháttum í Úkraínu. Ætlunin sé að reyndir stjórnmálamenn frá G7-ríkjunum fari til Kænugarðs og starfi að ráðgjöf á ýmsum lykilsviðum stjórnmála og viðskipta. Þýska stjórnin hafi til dæmis ákveðið að Georg Milbradt, fyrrv. forsætisráðherra í Saxlandi, verði fulltrúi sinn.

Angela Merkel kanslari ræddi þátttöku Breta við Theresu May forsætisráðherra þegar þær hittust á G20-leiðtogafundinum. Þá hefur Kanadastjórn ákveðið að taka þátt í verkefninu.

 

 

 

 

 

Skoða einnig

Jessikka Aro

Finnland: Nettröll í þágu Rússa hljóta þungan dóm

Stefnumótandi dómur féll í héraðsdómi Helsinki í Finnlandi fimmtudaginn 18. október þegar blaðakonunni Jessikku Aro …