Home / Fréttir / Ólöglegt bátafólk veldur Bretum áhyggjum

Ólöglegt bátafólk veldur Bretum áhyggjum

 

Á gúmbát á Ermarsundi - siglt frá Frakklandi til Englands.
Á gúmbáti á Ermarsundi – siglt frá Frakklandi til Englands.

Caroline Nokes, innflytjendaráðherra Breta, hefur lýst „miklum áhyggjum“ vegna frétta um fjölgun farandfólks sem reynir að komast yfir Ermarsund frá Frakklandi til Englands í bátkænum. Frá því í nóvember hafa 209 manns komist þessa leið til Englands.

Snemma að morgni fimmtudags 27. desember fundu breskir landamæraverðir 23 Írana á þremur stöðum á strönd Kent í suðaustur Englandi. Fáeinum klukkustundum áður höfðu Frakkar stöðvað ferð 11 manns á siglingu í smábáti skammt frá Sangatte á norðvestur strönd Frakklands.

Nokes sagði að þessi fjölgun á ólöglegum ferðum fólks yfir Ermarsund benti til þess að glæpahópar stæðu þar að baki.

Að morgni fimmtudagsins fundust fyrst níu Íranir, þar af þrjú börn. Þeir voru á ströndinni skammt frá bænum Folkstone í Kent. Hafði hópurinn siglt yfir Ermarsund á fjögurra metra löngum gúmbáti.

Matt Crittenden í björgunarmiðstöð í Littlestone-on-Sea sagði AFP-fréttastofunni að menn um borð í þyrlu miðstöðvarinnar hefðu séð fólkið og gert lögreglu viðvart.

Breska innanríkisráðuneytið sagði að læknar hefðu skoðað hvern og einn í hópnum. Allir fullorðnir hefðu verið fluttir til yfirheyrslu hjá útlendingaeftirlitinu en börnin nytu umhyggju félagsmálayfirvalda.

Ráðuneytið sagði að skömmu síðar þennan sama fimmtudagsmorgun hefðu tveir bátar til viðbótar sést í nágrenni við höfnina í Dover. Þar hefðu 14 íranskir karlmenn verið á ferð. Útlendingaeftirlitið hefði tekið þá til yfirheyrslu að lokinni læknisskoðun.

Á fáum siglingaleiðum er meiri umferð en um Ermarsund og þar hefur ferðum óskráðra smábáta sem farandfólk fjölgað jafnt og þétt þvert yfir sundið síðan í október.

Bresk yfirvöld höfðu hendur í hári 43 einstaklinga í lögsögu sinni við strönd Englands á jóladag og annan dag jóla.

Nokes sagði að embættismenn beggja vegna Ermarsunds samhæfðu viðbrögð sín í sameiginlegri upplýsingamiðstöð sem opnuð var í Calais í Frakklandi seint í nóvember 2018. Þar væri unnið gegn lögbrotum á landamærunum.

 

Skoða einnig

Myndin er tekin 12. ágúst 2019 í lokuðu borginni Sarov um 370 km fyrir austan Moskvu. Fólk kom saman til að kveðja fimm rússneska kjarnorkuvísindamenn sem fórust þegar reynt var að bjarga ónýtri, kjarnorkuknúinni stýriflaug.

Upplýst um rússneskt kjarnorkuslys á norðurslóðum

  Rússnesk stjórnvöld hafa beitt þöggun til að kæfa umræður um mannskæða sprengingu í kjarnakljúfi …