Home / Fréttir / Obama varar við nýrri tegund af hryðjuverkum

Obama varar við nýrri tegund af hryðjuverkum

Barack Obama ávarpar þjóðina úr forsetaskrifstofunni.
Barack Obama ávarpar þjóðina úr forsetaskrifstofunni.

Barack Obama Bandaríkjaforseti hét því í ávarpi til bandarísku þjóðarinnar að kvöldi sunnudags 6. desember að vinna sigur á Daesh (Ríki íslams). Hann sagði jafnframt að Bandaríkjamenn yrðu ekki „enn einu sinni dregnir inn í langvinnan og kostnaðarsaman landhernað“í útlöndum.

Örsjaldan ávarpar Bandaríkjaforseti þjóð sína beint úr skrifstofu sinni í Hvíta húsinu (Oval Office). Obama gerði það þó að þessu sinni. Hann sagði að hryðjuverkaógnin í Bandaríkjunum hefði „þróast á nýtt stig“ og vísaði þar til árásar tveggja hryðjuverkamanna í Kaliforníu í síðustu viku. Hann sagði að öfgahópar fjarri Bandaríkjunum gætu auðveldlega ýtt undir árásir þar.

„Þar sem við höfum náð betri árangri við að koma í veg fyrir flóknar fjölþættar árásir eins og 9/11 hafa hryðjuverkamenn snúið sér að einfaldari ofbeldisverkum eins og skotárásum á fjölda fólks sem eru alltof algengar í samfélagi okkar,“ sagði forsetinn. „Við kynntumst slíkri árás í Fort Hood árið 2009, í Chatttanooga fyrr á þessu ári og nú í San Bernandino.“

Lögreglan hefur fundið sannanir fyrir því að tveir byssumenn sem myrtu 14 manns í Kaliforníu miðvikudaginn 2. desember höfðu tengsl við öfgamenn múslima og Daesh-hópinn sem lýsti sig ábyrgan fyrir samstilltu árásinni í París föstudaginn 13. nóvember.

Obama sagði  ekkert benda til að byssumennirnir tveir, kona og karl, væru hluti af stærri hryðjuverkahópií Bandaríkjunum. Hann lýsti verknaði þeirra sem „hryðjuverki í þeim tilgangi að drepa saklaust fólk“.

Forsetinn hafnaði hugmyndum sem hreyft hefur verið um að fjölga beri bandarískum landhermönnum á svæðinu. Hann sagði að stefna sem fæli í sér þjálfun og búnað í þágu vinveitts herafla í Írak og Sýrlandi væri eina leiðin í átt að langvinnum friði.

Obama varaði einnig við að nota nýlega árás sem tilefni til árása á múslíma almennt í Bandaríkjunum og annars staðar í heiminum.

„Bandarískir múslimar eru vinir okkar og nágrannar, samstarfsmenn okkar, íþróttahetjur okkar,“ sagði forsetinn. „Og, já, þeir eru karlar og konur í her okkar sem eru fús til að leggja líf sitt í sölurnar til varnar landi okkar. Við skulum minnast þess.“

 

 

 

Skoða einnig

Bandarískir landgönguliðar í Noregi.

Bandarískum landgönguliðum fækkar í Noregi

  Frá árinu 2017 hafa 700 bandarískir landgönguliðar dvalist í Noregi. Hefur hver hópur þeirra …