Home / Fréttir / Norðmenn, Svíar og Finnar auka hernaðarsamstarf á norðurslóðum

Norðmenn, Svíar og Finnar auka hernaðarsamstarf á norðurslóðum

Atle Staalesen hjá Barents Observer tók þessa mynd miðvkikudaginn 23. september þegar varnarmálaráðherrar Finnlands, Noregs og Svíþjóðar rituðu undir samkomulag um nánara aðgerðasamstarf á norðurslóðum.
Atle Staalesen hjá Barents Observer tók þessa mynd miðvikudaginn 23. september þegar varnarmálaráðherrar Finnlands, Noregs og Svíþjóðar rituðu undir samkomulag um nánara aðgerðasamstarf á norðurslóðum.

Varnarmálaráðherrar Noregs, Svíþjóðar og Finnlands rituðu miðvikudaginn 23. september undir samkomulag um að auka hernaðarlegt samstarf sitt á norðurslóðum. Sama dag mótmæltu Svíar því við rússneska stjórnarerindreka í Stokkhólmi að 14. september hefðu tvær korvettur rússneska herflotans farið inn í sænska landhelgi skammt frá Gautaborg.

Varnarmálaráðherrarnir sátu utan dyra í Porsangmoen-herstöðinni nyrst í Noregi um 200 km frá Rússlandi þegar þeir rituðu undir samkomulagið sem gert innan ramma norræna varnarsamstarfsins, NORDEFCO og snýr að aukinni samvinnu um hernaðarlegar aðgerðir.

Í tilefni af undirrituninni sagði Peter Hultqvist, varnarmálaráðherra Svíþjóðar, við T4-sjónvarpsstöðina:

„Þetta tengist að sjálfsögðu ástandi öryggismála sem hefur breyst undanfarið. Við erum vitni að auknum flotaherstyrk Rússa á Múrmansk-svæðinu auk annars viðbúnaðar þeirra, við erum vitni að því að stofnuð er herstöð nálægt finnsku landamærunum … hvert sem litið er á norðurslóðum sjáum við Rússa styrkja stöðu sína.“

Í skjalinu eru einnig ákvæði um að koma á fót þríhliða stefnumótandi stýrihópi með aðild varnarmálaráðuneytanna auk þess sem skipaður verði þríhliða hópur til að gera strategískar áætlanir.

Frank Bakke-Jensen, varnarmálaráðherra Noregs, segir að samkomulagið stuðli að auknum sameiginlegum heræfingum á norðanverðum Skandinavíu-skaga. Hann er sömu skoðunar og sænski varnarmálaráðherrann að vegna aukinni hernaðarumsvifa Rússa verði að styrkja norrænt varnarsamstarf.

Í samtali við norsku vefsíðuna Barents Observer sagði norski varnarmálaráðherrann að menn yrðu að horfast í augu við þá staðreynd að yrði hættuástand eða kæmi til átaka í framtíðinni snerti það ekki aðeins eitt Norðurlandanna heldur þau öll og þess vegna ynnu þau sífellt æ meira saman.

 

 

 

 

 

 

Atle Staalesen

 

Skoða einnig

d732904406a9a685872c35e27d5632d064ed0a3ccbce4aa05eee423b81f0c0d2

Óvissa um framtíð klukkubreytinga innan ESB

Lokaákvörðunin er hins vegar innan einstakra ESB-ríkja. Þar verða yfirvöld að ákveða hvort áfram gildi …