Home / Fréttir / NATO-fundur: Varnir verða efldar og fælingamáttur aukinn

NATO-fundur: Varnir verða efldar og fælingamáttur aukinn

 

NATO-fundurinn var haldinn í nýjum höfuðstöðvum bandalagsins.
NATO-fundurinn var haldinn í nýjum höfuðstöðvum bandalagsins. (NATO/mynd)

Ríkisoddvitar NATO-ríkjanna samþykktu í Brussel miðvikudaginn 11. júlí að styrkja varnir og fælingarmátt NATO, herða baráttu undir merkjum bandalagsins gegn hryðjuverkjum og skipta byrðum innan bandalagsins á sanngjarnari hátt.

Jens Stoltenberg, framkvæmdastjóri NATO, sagði á blaðamannafundi í lok funda dagsins: „Ákvarðanirnar sem við höfum tekið í dag sýna að ríki Evrópu og Norður-Ameríku vinna saman. Árangur næst fyrir tilstyrk NATO og við höfum bundist fastmælum um að tryggja nærri milljarði íbúa landa okkar vernd og öryggi.“

Margar ákvarðana sem teknar voru á fundi ríkisoddvitanna 29 snúast um að gera NATO betur í stakk búið til að takast á við ný, erfið viðfangsefni á sviði öryggismála, þar á meðal er ný viðbragðsáætlun sem gerir ráð fyrir að virkja megi þrjátíu vélaherfylki, þrjátíu flugsveitir og þrjátíu herskip til notkunar innan þrjátíu daga.

Jafnframt var staðfest breytingin á herstjórnakerfi NATO sem felur í sér að komið er á fót Atlantshafsherstjórn í Norfolk í Virginíuríki í Bandaríkjunum og birgða- og flutningastjórn í Ulm í Þýskalandi. Ný netvarnamiðstöð verður stofnuð í Evrópuherstjórn NATO (SHAPE) í Mons í Belgíu.

Samþykkt var að NATO sendi nokkur hundruð þjálfara til að aðstoða stjórnvöld í Írak auk þess verður stuðningur aukinn við Jórdaníu og Túnis. Þetta er gert í því skyni að vinna gegn hryðjuverkum. Soltenberg tilkynnti að starfsemi væri hafin í miðstöð NATO í Napólí vegna aðgerða í suðri. Þaðan verður fylgst náið með þróun á suðurvæng bandalagsins.

Jens Stoltenberg áréttaði mikilvægi þess að byrðum sé skipt á sanngjarnari hátt milli aðildarríkjanna. Hann sagði að hernaðarútgjöld ykjust í öllum aðildarlöndunum. Í ár hafa átta NATO-ríki ákveðið þessi útgjöld á þann veg að þau nema 2% eða meira af vergri landsframleiðslu. Meirihluti ríkjanna stefnir að því að ná þessu marki árið 2024 eins ákveðið var árið 2014.  Framkvæmdastjórinn sagði að miðað við útgjaldaáætlanir einstakra ríkja í Evrópu og Kanada væri ætlunin að auka útgjöld til varnarmála um 266 milljarða dollara sérstaklega frá árinu í ár til 2014. „Við höfum því snúið vörn í sókn en betur má ef duga skal. Þetta snýst um sanngirni, þetta snýst um trúverðugleika okkar og umfram allt þá snýst þetta um öryggi okkar í heimi sem er ógtryggari en áður,“ sagðo Stoltenberg.

Á fundinum var ákveðið að bjóða ríkisstjórninni í Skopje að hefja aðildarviðræður. Að loknu ferli innan ríkisins sem ætlunin er að heiti Lýðveldið Norður-Makedónía að lokinni þjóðaratkvæðagreiðslu innan þess getur landið orðið 30. aðildarríki NATO.

 

 

 

 

 

Skoða einnig

Mikhail Mishustin

Pútín velur nýjan forsætisráðherra

Vladimír Pútín Rússlandsforseti gerði Mikhail Mishustin ríkisskattstjóra að forsætisráðherra Rússlands miðvikudaginn 16. janúar. Mishustin er …