Home / Fréttir / Leiðtogar G7-ríkjanna funda á Sikiley

Leiðtogar G7-ríkjanna funda á Sikiley

 

Frá G7-leiðtogafundinum í Taorima á Sikiley.
Frá G7-leiðtogafundinum í Taorima á Sikiley.

Leiðtogar G7-ríkjanna hittust á fundi í Taorima á Sikiley föstudaginn 26. maí. Fjórir nýir eru í hópnum forsetar Bandaríkjanna og Frakklands og forsætisráðherrar Bretlands og Kanada. Fundinum lýkur laugardaginn 27. maí en alþjóða- og öryggismál eru á dagskrá hans og ber baráttuna gegn hryðjuverkum hátt.

Á ríkisoddvitafundi NATO-ríkjanna í Brussel fimmtudaginn 25. maí var fallist á ósk Bandaríkjastjórnar um að NATO gerðist formlegur aðili að baráttunni gegn Daesh (Ríki íslams), hryðjuverkasamtökunum í Írak og Sýrlandi, sem láta að sér kveða með ódæðisverkum á Vesturlöndum, síðast í Manchester á Bretlandi mánudaginn 22. maí.

Auk þjóðarleiðtoganna sjö frá Bandaríkjunum, Bretlandi, Frakklandi Ítalíu, Japan, Kanada og Þýskalandi sitja tveir fulltrúar ESB fundin: Donald Tusk, forseti leiðtogaráðs ESB, og Jean-Claude Juncker, forseti framkvæmdastjórnar ESB. Í ræðu við upphaf fundarins sagði Tusk að mestu skipti að eining ríkti meðal ríkjanna um að verja skipan alþjóðamála sem reist væri á lögum og reglum.

Í fjölmiðlum er sérstaklega vakin athygli á þessum orðum vegna ágreinings innan G7-hópsins milli Trumps og Evrópumanna um loftslagsmál, frjáls viðskipti og þróunaraðstoð

Til þessa hafa lokayfirlýsingar funda af þessu tagi jafnan haft að geyma texta til stuðnings frjálsri verslun. Trump hefur hins vegar boðað verndarstefnu í þágu bandarískra hagsmuna þótt hann hafi ekki alltaf haldið fast í hana þegar á reynir í framkvæmd.

Gary Cohn, helsti viðskiptaráðgjafi Trumps, sagði að á Sikiley yrði rætt um viðskiptamál til að átta sig á hvað felst í orðunum „frjáls“ og „opin“ viðskipti.

Juncker bar föstudaginn 26. maí til baka fréttir frá deginum áður um að Trump hefði látið þau orð falla um Þjóðverja í samtölum í Brussel að þeir væru „vondir, mjög vondir“ vegna mikils viðskiptaafgangs þeirra. Í Frankfurter Allgemeine Zeitung segir sannað að Trump hafi notað orðið bad þegar hann gagnrýndi að Þjóðverjar flyttu meira út og inn.

Þá þykir óljóst hver verður afstaða Trumps til loftslagsamningsins frá París, Hann hefur hótað að losa Bandaríkin undan skyldum samninginn um að takmarka útblástur og loftmengun vegna hans.

Theresa May, forsætisráðherra Breta, sat aðeins fyrri dag fundarins og sneri heim að kvöldi hans. Laugardaginn 27. maí verða loftslags- og viðskiptamál efst á dagskrá. Þá er einnig ætlunin að hitta fulltrúa frá nokkrum Afríkulöndum. Ítalir sem fara nú með formennsku í G7-hópnum vilja ræða um Líbíu og komu farandfólks yfir Miðjarðarhaf frá Afríku.

Í júlí koma leiðtogar ríkjahópsins G20 til fundar í Hamborg þar verða meðal annarra fulltrúar Kína, Brasilíu og Rússland

 

 

 

Skoða einnig

Freigátan HMS Sutherland.

Breski flotinn eltir rússnesk herskip í Ermarsundi

  Breski flotinn hefur undanfarið sent níu herskip á vettvang til að fylgjast með sjö …