Home / Fréttir / Hryðjuverkaforingi laumaðist til Bretlands í aðdraganda árásar í París

Hryðjuverkaforingi laumaðist til Bretlands í aðdraganda árásar í París

 

Abdelhamid Abaaoud
Abdelhamid Abaaoud

Talið er að Abdelhamid Abaaoud sem skipulagði hryðjuverkaárásina í París 13. nóvember, þar sem 130 mann féllu, hafi laumast inn í Bretland á fölsku vegabréfi fáeinum mánuðum fyrir hryðjuverkið í París.

Frá þessu er sagt á vefsíðunni The Telegraph laugardaginn 26. desember. Abaaoud er talinn hafa verið í London til að leita eftir „tæknilegri aðstoð“ frá öfgamönnum múslima þar. Honum hafi tekist að komast til Bretlands, sem er utan Schengen, þrátt fyrir að vera eftirlýstur á alþjóðaskrá yfir hryðjuverkamenn.

Lögreglan í París felldi Abaaoud í átökum í St. Denis hverfinu í París 18. nóvember. Hann er talinn hafa verið stutt í Bretlandi. Heimildarmenn sögðu blaðinu The Sun að rannsakað væri hvort hann hefði komið til Bretlands í Kent.

Fyrir nokkru var skýrt frá því að Abaaoud hefði haft samband við „hóp samstarfsmanna“ í Birmingham í aðdraganda árásarinnar. Lögregla í borginni hvatti almenning þar til að „hafa augun hjá sér en ekki hræðast“ hún veitti frönskum yfirvöldum aðstoð við rannsókn málsins.

Hættustig í Bretlandi er nú severe – verulegt – hið annað hæsta sem bendir til að til árásar kunni að koma.

Abaaoud fæddist í apríl 1987 í Belgíu en fjölskylda hans fluttist þangað frá Marokkó. Hann bjó í Molenbeek-hverfinu í Brussel. Hann hafði forystu fyrir hryðjuverkahópi í belgísku borginni Verviers sem belgíska lögreglan leysti upp í janúar 2014. Hann var dæmdur að honum fjarstöddum í 20 ára fangelsi ásamt með 32 öðrum vígamönnum múslima. Hann hefur komið fram í áróðursmyndböndum Ríkis íslams (Daesh) og í tímaritum hryðjuverkasamtakanna þar sem hann hreykti sér af því hvernig hann komst undan handtöku. Lögreglu grunar að hann hafi staðið að baki hryðjuverkaárásinni um borð í hraðlestinni frá Amsterdam til Parísar 21. ágúst 2015.

 

 

Skoða einnig

Donald Tusk, forseti leiðtogaráðs ESB.

Harðar deilur Donalds Tusks og pólsku ríkisstjórnarinnar

Pólska ríkisstjórnin hefur sakað Donald Tusk, forseta leiðtogaráðs ESB og fyrrverandi forsætisráðherra Póllands, um að …