Home / Fréttir / Hælisleitendum snarfækkar milli ára í Danmörku og Noregi

Hælisleitendum snarfækkar milli ára í Danmörku og Noregi

Við landamæri Danmerkur.
Við landamæri Danmerkur.

Tæplega 3.500 manns sóttu um hæli í Danmörku árið 2017, hælisleitendur hafa ekki verið færri í landinu síðan 2008.

Tölurnar fyrir árin 2015 og 2016 þegar talið er að flestir farand- og flóttamenn hafi streymt til landsins sýndu að annars vegar hefðu 14.792 manns og hins vegar 21.316 sótt um hæli í Danmörku.

Í árslok 2017 lá fyrir að ekki hefðu færri sótt um hæli í Noregi síðan árið 1995. Hælisleitendur í Noregi voru 3.500 árið 2017 en 30.000 árið 2015.

Norsk yfirvöld hafa lokað nokkrum heimilum fyrir hælisleitendur vegna fækkunar þeirra undanfarna 12 mánuði. Fækkaði íbúum í slíkum gistiheimilum úr 13.400 í 5.100 á árinu 2017.

Yfirmaður norsku útlendingastofnunarinnar telur ólíklegt að hælisleitendum fjölgi í ár, þeir verði um 3.000.

Inger Støjberg, innflytjendaráðherra Danmerkur, segir að hömlur í útlendingareglum sem komið hafa til sögunnar síðan 2015 hafi stuðlað að fækkun hælisleitenda. Frá árinu 2015 hafa 67 nýjar hamlandi reglur verið settar um útlendingamál í Danmörku.

„Ég er ekki í minnsta vafa um að vitneskja um stranga stefnu okkar í útlendingamálum hefur borist víða út fyrir landmæri okkar og það eru einmitt áhrifin sem ég vildi að yrðu,“ sagði Støjberg í fréttatilkynningu sem fylgdi tölum ráðuneytis hennar.

„Ég hef aldrei efast um að flóttamenn gera upp á milli Evrópulanda eftir félagslegri aðstoð sem þar er veitt og ríkisstjórnin hefur nú lokað dönsku gjafabúðinni,“ sagði ráðherra.

Alls sóttu 3.458 manns um hæli í Danmörku árið 2017. Af málum sem var lokið enduðu 35% á þann veg að hæli var veitt segir í síðasta yfirliti sem birt var í nóvember 2017.´

 

Skoða einnig

Myndin sýnir Melaniu Trump forsetafrú, Donald Trump Bandaríkjaforseta og Andrzej Duda Póllandsforseta fyrir framan minnismerkið um uppreisnina í Varsjá á Karsinski-torgi í Varsjá 6. júlí 2017.

Rök fyrir Póllandi sem virki NATO gegn Rússum

Bandaríkjamenn þurfa traustan bandamann í miðhluta Evrópu. Pólverjar eru kjörnir til að gegna því hlutverki …