Home / Fréttir / Frakklandsforseti vill að Evrópa ábyrgist eigið öryggi

Frakklandsforseti vill að Evrópa ábyrgist eigið öryggi

Emmanuel Macron flytur ræðu sína á sendiherrafundinum.
Emmanuel Macron flytur ræðu sína á sendiherrafundinum.

Emmanuel Macron, forseti Frakklands, sagði í ræðu mánudaginn 27. ágúst að hann ætlaði að leggja fram nýjar tillögur á vettvangi Evrópusambandsins til að efla öryggi undir merkjum þess, sambandið yrði að hverfa frá því að treysta á mátt Bandaríkjanna.

„Evrópa getur ekki lengur treyst á Bandaríkin vegna eigin öryggis. Það er okkar að ábyrgjast evrópskst öryggi,“ sagði forsetinn í ræðu á fundi með um 250 sendiherrum, þingmönnum og alþjóðamálasérfræðingum sem komu saman til að marka stefnu og störf sín að loknu sumarleyfi.

„Ég vil að hefjum víðtæka endurskoðun á stöðu okkar í öryggismálum með öllum evrópskum samstarfsaðilum okkar, þar á meðal Rússum,“ sagði Macron og boðaði að tillögur sína yrðu nánar kynntar á „næstu mánuðum“.

Fréttaskýrendur minna á að skoða beri ræðuna í ljósi afstöðu Donalds Trumps Bandaríkjaforseta til ýmissa ríkja Evrópu í öryggis- og varnarmálum. Trump hefur talað niður til Þjóðverja og látið eins samstarf Bandaríkjamanna innan NATO ráðist af því hve mikið fé aðrar þjóðir leggja af mörkum til samstarfsins í bandalaginu.

Þegar Macron varð forseti í fyrra hét hann umbreytingu á ESB og hann hefur kynnt tillögur um uppskipti innan þess meðal annars með sérstökum fjálögum og fjármálaráherra fyrir evru-svæðið. Tillögurnar hafa hlotið dræmar undirtektir til þessa.

Þriðjudaginn 28. ágúst heldur Emmanuel Macron í þriggja daga ferð til Danmerkur og Finnlands þar sem hann mun leitast við að afla sjónarmiðum sínum um breytingar á ESB stuðnings. Draga má í efa að hugmyndum hans um minni samskipti við Bandaríkin verði vel tekið í Kaupmannahöfn eða Helsinki. Bæði dönsk og finnsk stjórnvöld leggja ríka áherslu á öryggismálasamstarf við Bandaríkjastjórn.

„Við verðum að sýna nýtt frumkvæði, skapa ný bandalög,“ sagði forsetinn. „Frakkar vilja Evrópu sem verndar, jafnvel á tímum þegar öfgahyggja hefur styrkst og þjóðernishyggja vaknað.“

Að því er varðar breytingar á ESB hefur Macron fengið dræmar undirtektir hjá Þjóðverjum sem mestu ráða innan sambandsins. Ummæli hans um aukið hernaðarsamstarf á vettvangi ESB eru hins vegar í takt við það sem Heiko Maas, utanríkisráðherra Þýskalands, hefur nýlega sagt.

Í grein í þýska Handelsblatt í fyrri viku hvatti Maas til þess að Evrópa „axli jafnan hluta ábyrgðarinnar“ og „skapi mótvægi“ gagnvart Bandaríkjunum á tímum kólnandi samskipta Evrópu og Bandaríkjanna.

 

Heimild: AFP

 

 

 

Skoða einnig

Myndin er tekin 12. ágúst 2019 í lokuðu borginni Sarov um 370 km fyrir austan Moskvu. Fólk kom saman til að kveðja fimm rússneska kjarnorkuvísindamenn sem fórust þegar reynt var að bjarga ónýtri, kjarnorkuknúinni stýriflaug.

Upplýst um rússneskt kjarnorkuslys á norðurslóðum

  Rússnesk stjórnvöld hafa beitt þöggun til að kæfa umræður um mannskæða sprengingu í kjarnakljúfi …