fbpx
Home / Fréttir / ESB-flotaaðgerðir gegn smyglurum hefjast hinn 7. október

ESB-flotaaðgerðir gegn smyglurum hefjast hinn 7. október

Federica Mogherini, utnaríkismálastjóri ESB, ræðir við herforingja um flotaaðgerðir ESB.
Federica Mogherini, utnaríkismálastjóri ESB, ræðir við herforingja um flotaaðgerðir ESB.

Federica Mogherini, utanríkismálastjóri ESB, sagði fimmtudaginn 24. september að flotaaðgerðir ESB hæfust gegn smyglurum á Miðjarðarhafi miðvikudaginn 7. október. „Pólitískar ákvarðanir hafa verið teknar, tækin eru tilbúin,“ sagði hún við AFP-fréttastofuna.

Hún sagði að flotadeild ESB hefði fyrirmæli um að fara um borð í skip, leita í þeim og taka þau á alþjóðlegri siglingaleið. Kæmi í ljós að ekki væri allt með felldu yrði áhöfnin handtekin og leidd fyrir ítalskan dómara.

Mogherini heimsótti höfuðstöðvar ESB-flotadeildarinnar, EUnavfor Med, í  Róm og sagði í ávarpi sínu þar að ESB hefði nú skýra mynd af vinnubrögðum smyglaranna. Söfnun upplýsinga um þá hófst skipulega á vegum flotadeildarinnar í júní 2015.

Hún sagði að nýlega hefðu 17 líbískir bátar og þrír egypskir verið greindir sem skip til skoðunar í þeim áfanga aðgerðanna sem hefst hinn 7. október.

Um er að ræða þrískipta áætlun, greiningu (1. áfangi), leit og handtöku (2. áfangi) og valdbeitingu í landhelgi Líbíu (3. áfangi). Til að 3. áfangi hefjist er nauðsynlegt að fyrir liggi samþykki öryggisráðs Sameinuðu þjóðanna (SÞ) eða stjórnvalda í Líbíu.

SÞ segja að meira en 300.000 manns hafi farið sjóleiðina til Evrópu á þessu ári, 200.000 frá Tyrklandi til Grikklands og 110.000 einkum frá Líbíu til Ítalíu.

Federica Mogherini lagði til að framvegis yrði EUnavfor Med auðkennt með nafninu Sófía í höfuðið á stúlku sem fæddist um borð í þýsku björgunarskipi.

Efasemdaraddir hafa heyrst um árangur af þessum flotaaðgerðum ESB. Vincenzo Camporini, fyrrverandi yfirmaður ítalska hersins, sagði við vefsíðuna EUobserver að lífi flóttafólks yrði stefnt í hættu ef floti ESB beitti smyglarana valdi á hafi úti.

Franco Roberti, ítalskur saksóknari með reynslu af glímu við mafíuna, sagði við AFP að í stað flotaaðgerða ætti ESB vinna með ríkjum N-Afríku við að brjóta upp smyglhringi.

Mika Pitkaniemi, yfirmaður í finnsku tollgæslunni, sagði við YLE-fréttastofuna að innan ESB felldu smyglarar sig í skjóli falsaðra sýrlenskra persónuskilríkja sem væru send í pósti frá Tyrklandi. Finnar hefðu gert 500 sendingar með fölsuðum skilríkjum upptæk, þar af 50 fimmtudaginn 24. september.

Heimild: EUobserver

 

Skoða einnig

Æðsti flotaforingi Bandaríkjanna fundar í Kaupmannahöfn

  Bandaríski flotaforinginn Mike Gilday, Chief of Naval Operations – æðsti yfirmaður bandaríska flotans – …